Prosegue até o remate de maio o concurso de debuxo en liña O que ves dende a túa xanela
martes, 26 de maio do 2020
A
Deputación de Pontevedra puxo en marcha, durante a crise sanitaria e
o confinamento máis estrito, un certame para estimular a
creatividade das nenas e nenos en tempos de reclusión, ao tempo que
se lles achegaba unha nova experiencia de imaxinación e
comunicación. Estamos
a falar do concurso de debuxo en liña O que ves dende a túa
xanela, que estimula o talento das rapazas e rapaces da
provincia menores de 14 anos para que compartan nas redes as
paisaxes, urbanas ou rurais, que teñen a oportunidade de contemplar
dende as súas fiestras. A Deputación informou de que o prazo de
presentación de contribucións estará aberto até o 31 de maio.
A
entidade provincial tamén fixo saber que o concurso está a ser un
éxito de participación, xa que se recibiron arredor dun centenar de
traballos, todos eles exemplos destacados de “calidade e
variedade”, explicou a Deputación.
Tematicamente
os debuxos non só amosan as vistas que teñen as autoras e autores
dende os seus domicilios, senón tamén o que lles gustaría facer
tras a crise sanitaria, onde varios e varias apostan por volver ao
colexio e xogar coas súas amizades.
Este
certame da continuidade ao convocado o pasado ano pola Deputación,
Descubre a túa provincia, unha iniciativa que permitiu que as
nenas e nenos participantes amosaran a través das súas obras
lugares emblemáticos da contorna pontevedresa e a súa riqueza
turística. Neste caso, a novidade radica na participación en liña,
debido á situación derivada da COVID-19.
As
crianzas poden enviar ata o 31 de maio os seus debuxos a través do
formulario dispoñíbel na web da institución provincial, con
dúas opcións, ou ben mandar directamente a fotografía ou imaxe
escaneada do debuxo (en formato PDF, JPG ou PNG) ou imprimir a lámina
coa creatividade do concurso que está habilitada na web, facer nela
o debuxo e fotografalo para remitilo tamén a través do mesmo
formulario.