Proliferan na Rede os xogos para vestir e maquillar a persoas famosas

Hoxe en día, calquera temática, por rara ou superficial que nos pareza, pode servir como argumento para elaborar un videoxogo ou unha película, polo que non é raro que nos atopemos con xente adita a xogos como o famoso Larry, no que os usuarios teñen que manexar a un retaco de home de medio metro dando voltas por un instituto para ligar a tódalas mozas que pille por diante e levalas á cama, ou ao máis recente Coking Mama de Nintendo, que polo visto fai que a cociña sexa “máis divertida”. A dicir verdade, son moitas as persoas que buscan protagonizar o seu propio videoxogo e Lady Gaga, como non podía ser doutra maneira, xa ten o seu, ao igual que o tivo Michel Jackson no seu día ou como o teñen os integrantes da última edición de Gran Hermano no noso país. Esta extravagante artista, denominada por moitos medios como a “última diva en Internet”, vén de lanzarse como moitos outros famosos á conquista dos videoxogos e xa se pode ver en moitas aplicacións en flash para xogar en navegadores, onde os internautas poden escoller o seu look, cambiándolle a roupa e a maquillaxe. En concreto, na páxina Dress Up Who, podemos dar con ducias de títulos do mesmo corte con personaxes distintos, dende bonecos xenéricos ata figuras tan populares como Pedro Picapedra ou a sensual Betty Boop, pasando por Angelina Jolie e a súa parella ou a polémica Britney Spears, que ten ata 6 aplicacións distintas para xogar a vestila e maquillala. Lady Gaga case iguala á súa colega de profesión con cinco videoxogos distintos nos que vestir á cantante e neles podemos retocar tódolos aspectos inimaxinables da boneca, dende as prendas de roupa ata os complementos e os peiteados. Asemade, pódese modificar a maquillaxe e cambiar a música de fondo. Porén na Rede tamén podemos atopar outras aplicacións máis traballadas que tamén usan a imaxe de Lady Gaga para protagonizalas. Trátase do xogo The Pokerisland Quest, unha aplicación na que a cantante debe percorrer unha illa evitando aos paparazzis e recollendo ítems, que foi creada o pasado ano para promocionar o tema Poker face.