Presenza galega no Encontro de Bloggers do Fórum Gastronómico de Girona

Segundo informa Manuel Gago no seu caderno en liña, vense de facer público o programa da segunda edición do Encontro de Bloggers do Fórum Gastronómico de Girona, unha xuntanza blogueiro-comensal que ben se pode considerar a inspiración da celebrado o ano pasado en Santiago. O dito evento catalá, inserido nun escenario máis amplo (o do Fòrum Gastronòmic), apóiase nun marco de novo cuño: o de non entender xa a cociña sen a promoción a través das canles dixitais e a participación dos seareiros-internautas.
Este enxalzamento do espírito blogger, programado para a tarde do sábado 21 do mes que vén, celebra así unha redistribución do papel de cliente (agora cada gastrónomo/a está en liña co resto de gastrónomos, favorecendo/a o fluxo de opinión e un achegamento máis veraz á realidade de cada establecemento e/ou cociñeiro). Así se fai saber no programa, abertamente dirixido a concentrar baixo un mesmo teito, o do Palau de Fires i Auditori Palaude Congressos de Girona, ao meirande número de bitacoreiros.
O caso é que o encontro terá presenza galega: a do propio Manuel Gago, que participará na xornada falando dos blogs como nova dimensión da comunicación gastronómica.
Asemade, está prevista a concorrencia de Francesc Guillamet e Maribel Ruiz de Erentxun, fotógrafos gastronómicos; Marc Cuspineda, cociñeiro, estilista fotográfico e colaborador de elBulli; Joan Gómez Pallarès, editor de De vinis e Roberto González, editor de El Pingüe.
Por certo que para participar na xuntanza blogueiro teremos que cumprir un único requirimento: contar con caderno propio e activo dende setembro de 2008.