Presentan en Compostela un completo iBook sobre as pegadas humanas da Illa de Ons
mércores, 25 de xuño do 2014
- Presentación do libro electrónico en Vigo /Imaxe de J.Santomé para El Faro de Vigo
O Centro Superior de
Investigacións Científicas está a presentar estes días un libro
electrónico dispoñíbel en tres linguas (galego, castelán e
inglés) sobre as pegadas humanas deixadas nunha das principais
(dende o punto de vista cultural, paisaxístico e medioambiental)
illas do noso litoral, Ons. O lanzamento da obra, cuxo título é
Ons: unha illa habitada, coincide co 80 aniversario do
pasamento de Xurxo Lorenzo (Ourense, 1910-Zaragoza, 1934), o primeiro
investigador deste senlleiro enclave da nosa costa. Asemade,
acompáñase da mostra fotográfica A Illa de Ons, unha cultura,
unha identidade, de Staffan Mörling, que se exhibe no Museo do
Pobo Galego.
Volvendo ao iBook do que estamos a falar, dicir que vén da man de Cristina Sánchez
Carretero e Paula Ballesteros Arias, co-autoras deste achegamento
multimedia ao pasado e presente da nosa illa. A obra, que
está xa accesíbel para iOS e que en breve chegará en formato
eBook, será presentada este xoves 25 de xuño no Museo do Pobo
Galego polas súas autoras, ás 19.00 horas, contando para a ocasión
coa presenza do director do espazo de exhibicións, Carlos García
Martínez. O iBook, informan, “é un percorrido pola presenza
humana na illa dende a prehistoria ata a actualidade” e nel
reúnense os resultados das investigacións realizadas na illa dende
2009 polo Instituto de Ciencias do Patrimonio (INCIPIT), cunha
“perspectiva interdisciplinar”, acerca da presenza humana nesta
parte do territorio. O CSIC está organizando, a través do dito
Instituto, actos en diferentes localidades de Galicia para presentar
ao público xeral este iBook. Así, xa se celebraron dúas
presentacións do mesmo en Vigo e Bueu.
O iBook sobre Ons, por
certo, constitúe o número 2 de Anaina, serie electrónica de
monografías didácticas e de divulgación posta en marcha polo
INCIPIT para achegar ao gran público os resultados das súas
investigacións. Divídese en cinco capítulos: o arquipélago de Ons
e o Parque Nacional das Illas Atlánticas de Galicia; a investigación
e o equipo de traballo; as súas xentes; os seus lugares e a súa
historia. Preséntase aos lectores de múltiples xeitos e a través
de diferentes linguaxes complementarias, tirando partido das
posibilidades multimedia que achegan os dispositivos intelixentes.
Deste xeito, permite (entre outras cousas) que escoitemos os sons da
illa (o mar, o día, a noite), ver vídeos de entrevistas onde os
seus habitantes falan sobre como foi e como é a súa vida diaria,
sobre a terra e o mar, sobre a posguerra, os anos de abandono e
posterior retorno á illa, ou descargar documentación orixinal sobre
os propietarios de Ons.