Presentadas en Pontevedra as axudas para a dixitalización das iniciativas dos autónomos
venres, 11 de agosto do 2017
A secretaria
xeral de Emprego, Covadonga Toca, presentou onte en Pontevedra as
vindeiras axudas do seu departamento para os autónomos e
emprendedores. Son unha serie de mecanismos para impulsar e
consolidar o emprego por conta propia. Estes mecanismos son as partes
integrantes do Bono Autónomo, que á súa vez encádrase na
Estratexia Autónomo 2020. Trátase, máis polo miúdo, dunha axuda
de até 3.000 euros por traballador, dirixida “a apoiar a
consolidación das empresas que contan cunha antigüidade mínima de
42 meses e unha facturación mínima de 12.000 euros”. As axudas
poden solicitarse até o 31 de agosto (a día de hoxe xa se recibiron
unhas mil solicitudes). A Xunta inviste nelas 3 millóns de euros.
Con este incentivo pódese facer avanzar dixitalmente a nosa
iniciativa de mercado.
Tal e como sinalou a directora xeral, “con este
cheque pódense contratar servizos de mellora de xestión financeira,
de optimización de procesos de produción e cadea loxística,
relanzamento comercial, imaxe e comunicación e posicionamento na
web”. Asemade, engadiu, “o bono tamén pódese empregar en plans
de mellora empresarial, mercadotecnia, redefinición do modelo de
negocio e identificación de socios e redes de cooperación ou no
financiamento de servizos que lles permitan afrontar novos retos”.
Amais, lembrou que para axudar ao afianzamento da
actividade empresarial e ao inicio da posta en marcha de novos
proxectos, o Goberno galego ten en marcha a Oficina do Autónomo no
dominio www.oficinadoautonomo.gal,
que actúa como “xanela única” onde os interesados “poderán
obter información en relación ao estado e progresos dos seus
expedientes abertos con calquera órgano ou unidade da propia
Administración galega”. Esta oficina, sinalou Toca, é “un punto
unificado e integral de asesoramento e consulta de acceso telemático
onde tamén se mostra toda a información sobre as axudas aos
autónomos”.