Premios en Galiciencia a un programa de TV e a un videoxogo sobre aeronáutica
xoves, 11 de maio do 2023
A
feira científico-tecnolóxica Galiciencia
que se celebra até este venres 12 no Parque Tecnolóxico de Galicia
(Tecnópole) baixo o lema Aeronáutica e Aeroespacial, incluíu
na xornada deste xoves a final do Desafío científico
Atrévete coa Aeronáutica!, no que durante os últimos meses
participou alumnado desde 4º de Primaria a Bacharelato de toda
Galicia de xeito online. Foron un total de 521 rapaces e
rapazas de 34 centros educativos diferentes.
- O equipo Los Dragones
O
gañador na categoría de Primaria foi o equipo Los Dragones de la
Ciencia, integrado por Sara, Mateo e Nehuén, do Colexio Maristas
de Ourense. Presentaron un programa de televisión no que unha
reporteira entrevistaba a un científico. “Queriamos amosar, de
maneira amena e divertida, as preguntas que ao longo destes meses nos
fomos facendo en relación á aeronáutica e aeroespacial, aportando
información e fotografías do Centro Astronómico da Veiga”.
Na
categoría de primeiro a terceiro de Educación Secundaria gañou o
equipo Andrómeda, do IES Val Miñor de Telleiras
(Pontevedra), formado por Pablo, Brais e Arantxa. Partiron dun
videoxogo para amosar a carreira do home por conquistar o espazo, a
través do reto marcado entre un humano e un extraterrestre. “Non
esperabamos chegar á final, só queriamos divertirnos”,
manifestaron todos os membros do equipo.
- O equipo Lóxicos e Defusos
Pola
súa parte, na categoría de cuarto de Secundaria a Bacharelato gañou
o equipo Lóxicos e Defusos, do IES Isaac Díaz Pardo de Sada
(A Coruña). Son Eva, Sara e Roque. Presentaron os diferentes tipos
de satélites que existen e as utilidades de cada un como os
meteorolóxicos, astronómicos, de comunicación, de navegación…
ata os solares e os espías. “Nós tiñamos moitas dúbidas sobre a
función dos satélites e pensamos que habería moita xente como nós
e por iso decidimos resolver esas dúbidas”.
Obradoiros
O
alumnado de Secundaria, Bacharelato e FP está a participar en tres
talleres diferentes. Baixo o título Por que son tan diferentes os
deseños dos avións?, están a construír modelos dun F-22
Raptor e dun C5-B Galaxy. Empregando ferramentas de enxeñaría,
investigan como a forma da súa estrutura axuda a determinar a
función dun avión.
No
obradoiro A conquista da atmosfera a rapazada coñece como o
home tivo que adaptarse a un novo medio cando comezou a voar, saber
como respirar, como vencer o frío, como orientarse… A partir de
materiais sinxelos “ven” turbulencias como as que se senten a
bordo dun avión.
No
taller Life jacket is under your seat! o alumnado comproba
como ao longo da historia os seres humanos foron adaptando as súas
necesidades de movemento á tecnoloxía dispoñíbel. Descobren que a
locomoción e o transporte consumen a maior parte das reservas de
enerxía de orixe fósil e como, ante as evidencias do cambio
climático, cómpre investigar novas formas de mobilidade,
achegándose aos modelos de transporte máis eficaces.
Ademais,
a rapazada de Secundaria e Bacharelato que expón os seus proxectos
na feira está a participar no taller A aventura de voar, que
se desenvolve na Aula Newton Galicia instalada en Tecnópole. O
obxectivo é que teñan a oportunidade de descubrir o mundo da
navegación aérea utilizando simuladores de voo profesionais.
Espectáculo
de ciencia
Na
mañá deste xoves 11 celebrouse un novo espectáculo científico. O
propósito desta experiencia foi que os máis novos descubrisen que a
ciencia pode ser atractiva e divertida para todos, intentando
provocar na rapazada unha reflexión sobre a súa importancia. Baixo
o título Ata o infinito… e máis aló, amosouse como a
historia da aeronáutica é a historia da evolución da tecnoloxía e
do coñecemento da humanidade.
O
vicepresidente Francisco Conde fará a entrega de premios
A
feira remata este venres 12 coa entrega de premios, da man do
vicepresidente primeiro e conselleiro de Economía, Industria e
Innovación, Francisco Conde, ás 13:15 h. O primeiro premio
está dotado con 1.000 €, o segundo con 500 e o terceiro con 200.
Ademais, premiarase a mellor comunicación e presentación oral, o
proxecto máis innovador, o proxecto co método científico e proceso
de investigación mellor definido, o mellor proxecto da temática
Aeronáutica e Aeroespacial e o liderado por unha nena e/ou
relacionado con iniciativas que contribúan á igualdade de xénero
no contorno da I+D+i. Haberá un premio especial para a mellor
proposta na categoría de FP; e galardoarase o proxecto coa mellor
valoración popular, elixido entre todos os participantes na
modalidade online.