Premiada unha tecnoloxía que permite traballar en experimentos dende o fogar
xoves, 20 de xaneiro do 2011
- Os recoñecidos no certame xunto aos promotores do mesmo, nunha imaxe de Actualidade Universitaria
Unha das vantaxes das redes é que podes levar
contigo o traballo. Claro que isto é aplicable só a un determinado tipo de
tarefas, xeralmente as ligadas ao coñecemento (difícil cavar regos a través do
computador), pero dun tempo a esta parte semella que a marxe de manobra está
sendo obxecto de ampliacións. Estas melloras nas posibilidades de traballo e
investigación a distancia son a base da iniciativa recoñecida
na VI edición do Premio UD-Banco Santander: o traballo de arquitectura web 2.0
para laboratorios remotos, WebLab_Deusto
3.0. A achega, que vén da man do
departamento de I+D do mesmo nome, consiste no fornecemento de tecnoloxía
web 2.0 para permitir labores de investigación científica dende emprazamentos
externos, incluíndose neste eido o propio fogar do axente innovador.
O traballo gañador está dirixido por Javier
García Zubia e senta os alicerces dun WebLab para as vindeiras xeracións, tamén
chamado iLAB, ou como se dixo antes, un laboratorio remoto sen máis. Trátase
dunha infraestrutura que mestura equipos físicos de informática, software e
estratexias didácticas para permitir que un alumno ou usuario complete
experimentos (electrónicos, eléctricos, mecánicos) dende a súa casa coma se
estivera fisicamente no laboratorio clásico ou presencial. En realidade, a
proposta non é cen por cen nova, coma case nada da innovación TIC. Os primeiros
laboratorios desta índole foron postos en marcha en 2000, pero con algunha que
outra diferenza. Daquela, as infraestruturas buscaban sobre todo acadar un
acceso a distancia aos traballos que se estaban a desenvolver, pero non se
lograron nin a eficacia nin a seguridade requiridas.
“O
proxecto WebLab-Deusto 2.0”, informan os responsables do certame
tecnolóxico, “é un paso máis para avanzar
no pulo á arquitectura 2.0, enmarcándose na area de TICs da educación en ciencia e enxeñería e no
servizo WebLab-Deusto, que arrincou en 2003”.
Por certo que o Premio UD-Banco Santander
incluíu tamén un accésit para o proxecto Detección
de malware mediante métodos de recuperación da información, unha achega que
contribúe ao localizamento e eliminación eficaz de novas variantes de virus. Este
traballo, desenvolvido polo equipo que dirixe Pablo García Bringas, mestura
algoritmos que posibilitan a detección de software pernicioso mediante a
aplicación de técnicas de information
retrieval (recuperación dos datos), realizándose unha análise de enxeñaría
inversa que descompón calquera aplicación informática nos seus compoñentes miúdos
para de contado avaliar o seu comportamento e estimar un nivel de risco.