Pontevedra fortalece a súa eAdministración con equipos de meirande capacidade
martes, 22 de maio do 2018
O Concello
de Pontevedra vai reforzar a súa Administración Electrónica
outorgándolle un extra de capacidade aos equipos informáticos cos
que conta. Así o fixo saber o Goberno local os días pasados,
informando de que os traballos a desenvolver (incluídos no contrato
para a consolidación da infraestrutura de virtualización da
Administración local) foron adxudicados á empresa Econocom
Servizos, firma con sedes en Vigo e na Coruña (entre outras
moitas cidades) e que centra boa parte do seu traballo no
fornecemento de tecnoloxías para a transformación dixital de
entidades públicas e empresas.
Máis polo miúdo, o fortalecemento TIC do
Concello de Pontevedra consiste na compra de tres novos servidores e
dous conmutadores de fibra para substituír outros tantos servidores
que teñen máis de 6 anos, “que se precisa que dispoñan de máis
capacidade”, sinalou o Executivo pontevedrés, debullando algúns
dos principais servizos que se apoian nestes tres servidores a
substituír: o directorio activo do Concello (validación de usuarios
e asignación de permisos), o xestor documental (no que se almacenan
todos os documentos que se xeran coa aplicación de xestión de
expedientes), a ferramenta de xestión de expedientes, o xestor de
correo electrónico corporativo, a intranet municipal ou a aplicación
de inventario, entre outras funcionalidades.
O Goberno local engadiu que estes novos
equipamentos dixitais “permitirán mellorar as prestacións dos
equipos informáticos municipais, facilitando o labor cotián dos
traballadores públicos e, polo tanto, a atención aos veciños en
termos de fiabilidade e rapidez”. A adxudicación foi por 47.483,29
euros e a empresa ten un prazo de execución de 2 meses para a
instalación destes equipos.
O Concello asumirá con fondos propios esta
contratación. Porén, esta atópase incluída dentro dos proxectos
municipais susceptíbeis de financiamento cos Fondos Europeos de
Desenvolvemento Rexional (FEDER), que asumirán o 80% do gasto e o
20% restante correrá a cargo da Administración local.