Ponteareas presenta unha app para dispensar tíckets electrónicos de atención cidadá
mércores, 13 de maio do 2020
O
Concello de Ponteareas presentou un novo paso adiante na súa
carreira tecnolóxica, acelerada con múltiples iniciativas en tempos
de crise sanitaria. Estamos
a falar dunha aplicación para o obter o tícket electrónico de
atención cidadá, unha medida que, segundo fixo saber o
concelleiro de Innovación Benito Márquez, ten o obxectivo de evitar
ringleiras de espera ás veciñas e veciños nos diferentes servizos
de atención ao público. Tamén ten a finalidade de protexer a saúde
da veciñanza e dos traballadores municipais.
O
concelleiro de Innovación e Desenvolvemento Tecnolóxico, Benito
Márquez, deu a coñecer a implantación nestes semanas dun novo
sistema intelixente de atención cidadá en tódolos departamentos
que prestan actualmente servizos de atención ao publico. “O
obxectivo é continuar prestando os servizos de atención,
respectando as medidas de saúde, seguridade e hixiene impostas pola
COVID-19”, dixo, engadindo que o novo contexto que estamos a vivir
guinda un cambio radical no xeito de relacionarnos, “e dende o
Concello debemos de dar resposta a todas as necesidades críticas
xurdidas a raíz desta nova situación”.
O
novo sistema que se está implantando permite a obtención dunha
quenda dende o teléfono móbil ou a través da web (tícket
electrónico), así como o seu seguimento a distancia e a
notificación da quenda, evitando o uso de elementos táctiles
públicos para a obtención da mesma, co fin último de
desconxestionar as salas de espera e permitindo que o cidadán acuda
unicamente cando estea a punto de ser chamado para a súa atención.
Segundo
fixo saber o edil respecto do funcionamento do sistema, as veciñas e
veciños poderán pedir cita de maneira telemática, a través dunha
aplicación móbil, e estarán en disposición de seguir a cola en
tempo real para os tíckets electrónicos xerados. A través da
aplicación móbil, recibirán datos en tempo real do número de
persoas en espera e do tempo aproximado para seren atendidas/os. Así,
cando a súa quenda estea próxima, “recibirán no móbil unha
notificación, realizando a espera na rúa, na casa ou no coche,
mantendo a distancia de seguridade”, sinalou o concelleiro
socialista Benito Márquez.