Política Lingüística "disfraza" a campaña E logo! e convoca un concurso de fotografía en liña
xoves, 15 de febreiro do 2007
Mesmo nestas datas de Antroido (ou Entroido) os galegos semella que seguimos coa teima de esquecer o noso para subirnos a unha carroza vestidos de pavos reais e con música reguetón (que tampouco parece mala idea, sempre que nos acaia ben o traxe de raíña canaria, claro). Se cadra é nun intento de poñer en valor o que xa temos onde hai que encadrar as novas iniciativas da Secretaría de Política Lingüística arredor da web www.galegoelogo.com. Trátase, en palabras do propio departamento, de promover a lingua galega coa chegada do Entroido (e viceversa) e, entre outras cousas, poñendo a disposición dos internautas a opción de “disfrazar” o logotipo da campaña, logo de descargalo.
Ademais, Política Lingüística vén de presentar un concurso de fotografía (Enfoca o galego) co que se achegarán galardóns a aquelas imaxes que “simbolicen a lingua galega”. O prazo do certame ficará aberto até o último día de setembro e as propostas serán votadas e comentadas polos internautas, co fin de facer unha selección final que logo será estudada por un xurado. O autor recibirá como premio unha cámara fotográfica réflex dixital.
Todas as fotografías finalistas formarán parte dunha exposición que se organizará a finais deste ano.