Plexus aborda o seu proceso de externalización cunha delegación propia en México DF
martes, 3 de xullo do 2012
A empresa galega Plexus
amplía área de influencia. E faino a través do Atlántico e co punto de mira nun
dos países de meirande peso e potencial de crecemento: México. Esta estratexia
materialízase nunha nova delegación na capital, unha oficina que, en palabras
da empresa TIC, “suporá o inicio de
operacións de negocio cos seus produtos tecnolóxicos e o establecemento dunha
base de operacións estable dende a que atender o mercado local e acceder a
outros escenarios en países da contorna, como Panamá ou Costa Rica”.
Plexus, firma con sede en Santiago, aborda esta decisión como parte dun
reto de internacionalización que abranguerá acordos con empresas españolas e de
Marrocos, Perú, Ecuador e Colombia. A empresa, dirixida por Antonio Agrasar, o
seu conselleiro delegado, elixiu México D. F. para arrancar o seu proceso de
actividade exterior por dous motivos fundamentais: pola demanda de clientes
potenciais (sobre todo do sector sanitario) e pola situación xeográfica estratéxica
respecto a outros mercados nos que xa se detectaron oportunidades de negocio.