Play-Doc e a revista dixital galega A Cuarta Parede preparan unha escola de críticos de cinema
luns, 24 de febreiro do 2014
- O seminario está organizado polos responsables de A Cuarta Parede
A nova edición do
festival galego Play-Doc,
prestixioso certame emprazado en Tui e centrado en dar conta do
mellor da produción internacional do xénero documental, vai vir coa
súa faceta formativa especialmente reforzada. Entre outras cousas,
segundo nos conta a organización, o festival vai pór en marcha un
seminario con prestixiosos profesionais do sector organizado pola
revista dixital de cinema A
Cuarta Parede, unha máis
que interesante publicación en liña na nosa lingua e feita por
xente da nosa terra.
Máis polo miúdo, do que se trata é dun obradoiro para críticos
novos.
Nas
sesións, desenvolvidas baixo o epígrafe A crítica
intermedia, amosaranse aos
alumnos as diferenzas entre os textos teóricos e xornalísticos e as
craves para atopar e desenvolver “a paixón da espontaneidade
cinéfila”. Con estes obxectivos, o seminario contará cos
diferentes puntos de vista de diversos representantes do sector, como
por exemplo Antonio
Weinrichter, reputado especialista en cinema documental, o
catedrático da USC José Luís Castro de Paz, e os críticos da
prestixiosa revista Caimán Cadernos de Cinema,
Jara Yáñez e José Manuel López. Tamén
participará o co-director de A Cuarta Parede,
Iván Villarmea, que achegará un obradoiro sobre xéneros
xornalísticos aplicados á escritura sobre cinema. O seminario
compleméntase cun prácticas na devandita revista dixital, que
lanzará e presentará perante o mundo os textos elaborados polos
alumnos en Play-Doc, sobre películas proxectadas no certame.
Lembrar
que a nova entrega de Play-Doc celébrase do 2 ao 6 de abril.
Asemade, o festival abre dende a pasada fin de semana e até o 24 de
marzo a convocatoria para que os interesados no dito festival poidan
inscribirse. As bases poden consultarse en liña (en formato PDF). Informar tamén que os responsábeis de A Cuarta
Parede presentarán no festival o libro Jugar con la memoria.
El cine portugués en el S. XXI, escrito por colaboradores da
revista, e editado por Shangrila. Trátase, sinaslan, “da primeira
monografía en español sobre a última gran xeración de cineastas
lusos, que inclúe nomes premiados en festivais internacionais, como
Miguel Gomes (Tabú) ou João Pedro Rodrigues (Morrer Como
Um Homem)”.