Paradores de Turismo adapta a súa páxina web ao galego

A páxina web de Paradores de Turismo xa está dispoñible en galego, para que os usuarios de Galicia piodan ler a información actualizada sobre a compañía, así como as novidades no mundo da gastronomía ou as ofertas da xeografía española no idioma propio da Comunidade, segundo indicou nun comunicado Paradores.
Así, os galegos que desexen obter información e realizar as súas reservas na súa lingua materna xa poden facelo a través da páxina web de Paradores.
Ata agora, a páxina da empresa ofrecía os seus servizos en dúas linguas oficiais; o castelán e o catalán, así coma versións máis reducidas en tres linguas estranxeiras (inglés, alemán e francés), pero o peso dos clientes galegos na rede de Paradores, cuns 11.500 Amigos de Paradores residentes en Galicia (preto do 3% do total de membros do programa de fidelización), levou á adaptación da súa páxina web á nosa lingua.
Nos vindeiros días completarase a web coa incorporación dos contidos en éuscaro.