Ozona convértese en integrador único para España de tecnoloxía de identificación de Swivel
mércores, 21 de marzo do 2012
Ozona, compañía
galega centrada na análise e desenvolvemento de proxectos de cloud e virtualización, vén de unir
forzas con Swivel Secure para distribuír
en España e máis en Portugal a tecnoloxía PINSafe en modo SaaS. Con este
acordo con Swivel, empresa do panorama internacional especializada en
ferramentas de autentificación sen token
(dispositivo electrónico co que conta o usuario autorizado dun servizo para
facer máis doado o proceso de recoñecemento), Ozona engade á súa ampla listaxe
de servizos na nube un servizo de identificación que “ofrece un xeito rápido e sinxelo de mellorar e de reforzar os métodos
de autentificación de solucións web, VPN”, informa a firma galega.
Segundo conta máis en detalle, PINSafe é un
recurso forte e de factor duplo baseado en tecnoloxía patentada por Swivel que
permite, entre outras cousas, o acceso de maneira segura a aplicacións
corporativas a través de redes privadas virtuais (VPN), sitios e máis aplicacións
web mediante o uso de dispositivos móbiles ou de un navegador web. “Unha característica fundamental disto”,
di Ozona, “é a ausencia de tokens físicos,
o que evita os problemas loxísticos da distribución, substitución, perda, deste
tipo de solucións”. E puntualiza a empresa son sede en Santiago: “Grazas a este produto as compañías poden
ofrecerlles aos seus usuarios, internos e externos, unha solución sinxela,
potente e económica que erradica calquera tipo de ameaza como duplicación de
tarxetas, suplantación de identidades ou rexistro das pulsacións do teclado,
tamén coñecido como key-logging”. Para as empresas que queiran entrar en
contacto coas vantaxes deste servizo, dicirlles que Ozona achégalles ás compañías
interesadas un mes de proba, gratuíto, co devandito produto. PINSafe en modo
SaaS presentarase no evento SITI asLAN,
entre os días 27 e 29 de marzo, no recinto IFEMA (Madrid).