Ouvirmos presentará en Culturgal o seu material interactivo sobre instrumentos galegos
xoves, 1 de decembro do 2011
Entre as novidades tecnolóxicas galegas que
imos poder coñecer esta fin se semana no Pazo da Cultura de Pontevedra, no
marco de Culturgal, contaremos coas que
veñen da man do selo Ouvirmos, especializado
en documentación musical galega e responsábel entre outras cousas do mapa
sonoro de Vigo. Ouvirmos, que participará no programa de actividades da feira
cun curso de cociña infantil, aproveitará a ocasión para presentar dúas novidades
editoriais, a colección de cociña para nenas e nenos e a Guía Didáctica de
Instrumentos Galegos.
Contará para amosar os seus proxectos perante
o público cun stand propio, aberto as
tres xornadas de Culturgal (do venres 2 ao domingo 4). A idea é a de permitir
que os visitantes podan establecer o máximo contacto cas achegas tecnolóxico-culturais
de Ouvirmos, entre as que se inclúe o devandito manual sobre instrumentos, un
libro-CD que vén da man de Moisés Quintás e que inclúe unha exhaustiva clasificación
e descrición dos instrumentos galegos e as súas partes, coa súa etimoloxía,
orixe e evolución. “Trátase dunha
excelente ferramenta de apoio para o coñecemento e ensino da música galega,
ilustrada con máis de 100 fotografías e acompañada de 40 pistas de audio con
todos os instrumentos, incorporando ademais unha pista interactiva en formato
web con múltiples recursos e un obradoiro para a construción de instrumentos
sinxelos”, sinalan dende o selo galego, que presentará o libro-CD o domingo
4 a partir das 11.30 horas.