Os usuarios de Insere 2.0 salientan o potencial deste servizo galego de inserción laboral
luns, 21 de maio do 2012
- Alba Costas, unha das usuarias do programa, no seu posto de traballo
A Asociación de Empresarios de Mos, AEMOS, puxo co comezo do ano un novo
proxecto tecnoloxico-dixital. Esta nova iniciativa, chamada Insere 2.0 e dirixida a favorecer o
emprego, súmase a outras recentes, como por exemplo un proxecto formativo
baseado na aprendizaxe virtual. Tal e como sinalamos recentemente
en Código Cero, Insere 2.0 encamíñase a tirar partido das redes e os seus
recursos actuais para favorecer a busca e a consecución dun posto de traballo
entre as/os demandantes de Mos (Pontevedra) e a súa contorna. A asociación, agora, fixo reconto do acadado
ao abeiro da iniciativa. Segundo informa, os usuarios de Insere 2.0 están a
valorar moi positivamente a súa inclusión no plan, cualificándoo de “enriquecedor e formativo”.
A día de hoxe, Insere 2.0 rexistrou xa 26 insercións laborais e 43
contratos asinados. A través desta estratexia, 102 persoas están a pór en
marcha o seu propio Plan Persoal de
Emprego. Este abrangue accións de información, formación, asesoramento e
realización de prácticas laborais en empresas, así como sesións e dinámicas “que lles permiten afrontar a procura de
emprego nun intre desfavorável”, informa AEMOS. E engade: “O
desenvolvemento destes seis primeiros meses do programa permitiu acadar até 43
contratos, todo isto grazas á promoción constante que os técnicos realizan
empresa a empresa, de acordo ao estudo de cada participante e dos perfís
profesionais presentes nas empresas”. O programa posto en marcha pola
asociación empresarial co apoio do Concello de Mos e a Consellería de Traballo,
baséase en boa medida no uso da web aemos.es/insere, unha ferramenta que achega todo tipo de contidos para os colectivos
desempregados: ofertas de emprego, bolsas, busca activa dun posto de traballo,
emprego público, un espazo para os emprendedores, formación e ligazóns a outros
portais semellantes e a páxinas web de interese para o usuario.