Os usuarios Linux de Rianxo abren campaña para eliminar Rianjo do Facebook
xoves, 9 de abril do 2015
Fartos de ver como se lles deturpa o nome do seu
concello en múltiples mapas en liña (e non é de estrañar que se
lles rebordara o vaso da paciencia, tendo en conta o moito que se ten
feito, ao longo de décadas, para erradicar a forma incorrecta do seu
topónimo, forma errónea que ademais ninguén con sentido común usa
xa), o Grupo de Usuario de Linux de Rianxo (GULIR) vén
de abrir campaña para suprimir definitivamente “Rianjo” das
cartografías dixitais da rede social Facebook.
A iniciativa, que
se quere teña influencia sobre os restantes topónimos deturpados da
nosa terra que seguen a figurar na Internet ao alcance de todas e
todos, estará aberta até o 17 de abril. A petición (unha moción
popular) será presentada ao grupo de Goberno de Rianxo para que se
afonde nela no pleno municipal.
O obxectivo, cóntase nos medios, é
facer fronte común para que Facebook (a máis popular das redes
sociais, polo menos no que a número de usuarios mundiais se refire)
mude o topónimo deturpado no seu servizo de mapas e localización.
Para o grupo de usuarios de Rianxo, que se perpetúe a inclusión
deste nome incorrecto impide o normal uso da forma axeitada e
oficial, bloqueando tamén a procura de datos diversos (actividades,
festas, información turística) sobre o concello.