Os robots LEGO loitarán este ano contra as enfermidades
venres, 10 de decembro do 2010
Un ano máis, e xa van 22 dende a súa inauguración
alá polo 1988, arrinca en España a First LEGO League, a competición
internacional de robótica para escolares de entre 10 e 16 anos na que se
deseñan e constrúen robots unicamente con pezas LEGO.
Nesta edición, a organización desafía aos
participantes a construir mecanismos que axuden a loitar contra as
enfermidades, co obxectivo, segundo apuntan, “de mellorar a nosa calidade de vida”.
En total realizaranse 15
torneos clasificatorios en Biscaia, Barcelona (2), Pamplona, Madrid, Xerona,
Xixón, Cornellà del Llobregat, Sevilla, Granada, Xaén, Xerez, Córdoba, Málaga,
Almería e Castela e León; así como a Gran Final Española, que terá lugar en
Bilbao.
Este ano, a FLL contará no
noso país con máis de 300 equipos e máis de 2.700 estudantes.
Coma nas edicións anteriores,
os escolares empregarán os equipos tecnolóxicos de LEGO Mindstorms e moitas
pezas LEGO para, coa axuda do seu adestrador, construir e programar un robot
que resolva o desafío deste ano mediante retos da vida real.
Tamén deberán investigar en
Internet, conversar con científicos, visitar bibliotecas e librarías e
desenvolver unha presentación do seu proxecto.
En resumidas contas, este
concurso organizado anualmente por LEGO e patrocinado pola compañía tecnolóxica
española GMV, permitirá, un ano máis, que os nosos mozos e mozas se divirtan e
se emocionen coa ciencia e a tecnoloxía, fomentando futuras vocacións
científico-tecnolóxicas mediante os valores da innovación, a creatividade e o
traballo en equipo.
Os e as participantes únense
en equipos de entre 4 e 10 membros e contan co apoio dun adestrador que durante
10 semanas os guía na preparación do torneo; nesta ocasión o desafío Body
Forward permitiralles explorar na fronteira da enxeñaría biomédica para
descubrir formas innovadodras de reparar lesións, superar predisposicións
xenéticas e maximizar o potencial do corpo, coa finalidade de acadar unhas
vidas máis felices e saudables para todos e todas.
Haberá
dúas categorías: unha competición contrarreloxio de robots, e unha presentación
do proxecto de investigación científica.
Os
premiados e premiadas na Gran Final FLL España poderán acudir aos torneos
internacionais: World Festival (St. Louis, USA, do 27 ao 30 de abril de 2011), ou
ben no Open European Championship (Universidade de Delft, Holanda, do 2 ao 4 de
xuño de 2011).