Os responsábeis de MEET-Teleco repasan na UVigo un ano de aprendizaxe en asesoramento e dirección
xoves, 3 de abril do 2014
O coñecemento
enriquece a quen o recibe e tamén a quen o dá. Por outra banda, o
fluxo continuo de información e experiencias é hoxe en día unha
fórmula que os estudantes das nosas universidades deben asumir, si
ou si, de cara a formar parte dos sectores produtivos máis
innovadores. Partindo desta premisa de cooperación e asesoramento
entre estudantes (futuros profesionais TIC), púxose en marcha o
programa MEET-Teleco
na Universidade de Vigo, que xa leva un ano en activo e que se
dirixe, en palabras dos seus responsábeis, “a permitir o titorado
dos estudantes novos por parte dos xa veteranos”. Na
iniciativa participaron 28 mentores dos últimos cursos de Enxeñaría
de Telecomunicación. Ao abeiro de MEET-Teleco foron quen de
adquirir experiencia en apoio e mentoring. No seu caso
particular, apoio e mentoring dirixido aos seus compañeiros
máis novos.
Na iniciativa traballa
Javier Cebreiros, comunicador e responsábel dunha parte da formación
dos integrantes deste programa. Ao seu xuízo, “a evolución dos
titores é impresionante, nótase que están moi implicados e que,
para eles, está a ser unha experiencia persoal incrible”. E
engade: “Están completamente centrados en sacar o mellor dos seus
titorizados, e despois deste tempo chegaron a esquecer o seu e mesmo
ás veces das súas carreiras para centrarse nos demais estudantes,
orientando todas as súas preguntas a como axudalos, como motivalos”.
Segundo informa a
UVigo, Cebreiros vén de xuntarse nunha segunda sesión de traballo
(a primeira foi en setembro) cos integrantes do programa. Durante a
primeira xeira, ao comezo do titorado, centrou o seu labor en amosar
metodoloxías para comunicar do mellor xeito posíbel, abrindo marxe
para que os mentores puideran dar corpo ás ideas propostas no
desenvolvemento das súas funcións. Agora e logo de doce meses de
aplicación práctica das ideas propostas, a cuestión céntrase en
amosar recursos que axuden aos mentores de hoxe a seren líderes das
súas respectivas empresas TIC o día de mañá. Segundo fai saber
Cebreiros, “o máis importante é se deciden liderar, e non que
lles digan como facelo” explica, afirmando que “se eles mesmos
deciden adoptar de verdade esa actitude de líder e sacar o mellor da
persoa liderada, é definitivo para que poidan conseguilo”.