Os responsábeis de Appladin abren rolda de financiamento para levar a aplicación ao eido internacional
mércores, 4 de febreiro do 2015
Entre as aplicacións de
raizame galega que se deron a coñecer ao longo do ano que vimos de
deixar atrás, sen dúbida entre as máis salientábeis atópase
Appladin, unha ferramenta de gran
interese empresarial, laboral e social e que se dirixe, basicamente,
a botar unha man aos internautas que estean á procura dun posto de
traballo. Dito doutro xeito: estamos ante un recurso móbil que
conecta autónomos e clientes, profesionais e contratantes, segundo a
súa situación xeográfica. Segundo nos contou en novembro Alberto
Rodríguez, socio fundador da iniciativa, o
obxectivo deste desenvolvemento pasa por contribuír a que nos
afagamos aos novos xeitos de atopar traballo, xa que as formas
mudaron, e tamén pasa por converter a tarefa de buscar un posto
laboral en algo que se poida facer en calquera intre e lugar. Agora,
o novo obxectivo é acadar 240.000 euros para espallar a iniciativa
no eido internacional.
Segundo
se fai saber dende a revista Eco (Eixo Atlántico) reflectindo fontes
directas dos creadores de Appladin, esta vén de abrir a súa
primeira rolda de financiamento tras comezar a actividade de seu con
capital privado. Isto que significa? Pois basicamente que calquera de
nós pode participar no proceso de crecemento con cifras que parten
dos 1.000 euros de contribución. A meta, como dixemos, será
impulsar a presenza de Appladin noutros mercados, dado o seu elevado
potencial (xa conta con máis de 11.000 usuarios en España). Segundo
apunta Alberto Rodríguez, “dende o principio estivo claro que ía
haber demanda e mercado”. Os meses recentes foron meses de “éxito
repentino”, engade, e este proceso de medre fulminante fíxolles
pensar a Alberto e aos seus compañeiros “que a idea tamén podía
funcionar noutros moitos países”. Como dixemos, o obxectivo é
chegar aos 274.000 euros, e xa se recadou a metade do total.
Sobre o seu funcionamento e o seu alcance
Appladin, en palabras dos
seus creadores “a primeira aplicación de emprego do sector
servizos”, achégase con descarga e rexistro de balde. Unha das
súas principais características, a maiores do devandito, é a marxe
de manobra que pon a disposición do usuario. Así, con esta
aplicación é o propio demandante ou ofertante quen ten o control da
xestión do servizo ou os servizos. Ademais, pon en contacto
directamente a ofertante e demandante, adaptando así ao mellor
profesional para cada servizo ou traballo.
Pódese descargar en
calquera teléfono móbil desde Apple
Store ou Google
Play. Dispón de valoración e opción denuncia para mellorar a
calidade do servizo así como para premiar aos máis salientábeis
profesionais de cada área. Desta maneira, un usuario poderá ter
referencias de calquera profesional antes de contratar o seu
servizo.