Os responsábeis das escolas europeas na nube achegan en Santiago os seus obxectivos e prioridades
xoves, 12 de decembro do 2013
- A xuntanza de hoxe na Consellería de Cultura nunha imaxe de Ana Varela
A Rede
de Escolas da Nube do CESGA e Balidea volve estar hoxe de
actualidade, se é que algunha vez, ao longo destes anos recentes, as
súas potencialidades e implicacións deixaron de de estalo
(potencialidades e implicacións para normalizar o uso das TIC das
nosas escolas máis afastadas dos centros urbanos e para permitirlles
innovar no eido educativo con novos recursos e ferramentas). Pois
ben, resulta que a Rede vai alentar coa bagaxe xerada un proxecto
máis amplo, RuralSchoolCloud, unha iniciativa europea que abrangue
escolas galegas, de Dinamarca, Grecia, Italia, Macedonia e Reino
Unido, experimentando con achegas da nube para lanzar a educación
dos espazos non urbanos cara a vangarda TIC e unha estratexia de
traballo cooperativo. Pois ben, os
responsábeis da iniciativa europea reuníronse este xoves coa
Consellería de Cultura.
Isto fíxose posíbel
grazas á reunión de traballo dos propios compoñentes de
RuralSchoolCloud, xuntanza que promoveu este departamento da Xunta.
Precisamente a Consellería de Cultura, xunto coa Axencia para a
Modernización Tecnolóxica de Galicia (AMTEGA), achegan o seu apoio
na Rede de Escolas da Nube ao CESGA, a firma compostelá Balidea e
máis ao grupo de investigación en Tecnoloxía Educativa da USC, que
son os coordinadores do proxecto. Lembrar que a Rede de Escolas xa
ten subido á nube aos CRA de Boqueixón, Vilaboa, Ponteceso e
Ribadavia. Son precisamente estas escolas as que participan neste
novo proxecto a nivel europeo. A iniciativa tamén conta co respaldo
da compañía tecnolóxica HP. O resto de socios pertencen a
institucións educativas de Dinamarca, Grecia, Italia, Macedonia e
Reino Unido con relación directa con centros educativos emprazados
no rural ou en zonas con dispersión demográfica.
Ao encontro deste xoves
asistiron o director xeral de Educación, FP e Innovación Educativa,
Manuel Corredoira; María R. Malmierca e Diego Nieto, do CESGA;
Beatriz Cebreiro, Carmen Morante, Santiago Argüeso, Carol Gillanders
e Javier Garbayo, da USC; Bruno Rubio, de Balidea; e Yolanda Neira e
Cruz Martínez, do CRA de Boqueixón-Vedra. Asemade, tomaron parte na
reunión Santoas Agudo, do Goberno da Rioxa; e mais Samuel Gómez e
Vanessa Ibañez, en representación dun colexio rural agrupado desta
mesma Comunidade rioxana. A representación de outros países estivo
conformada por Hanne Wacher Kjaergaard e Raffaele Brahe-Orlandi
(Dinamarca); Arturo Gagliardi e Mariangela Pastanella (Italia);
Konstantina Zachari, Sokratis Pappas e Spiros Ntouvlis (Grecia), Bill
Houldsworth e Geoff Tew (Reino Unido); e Zoran Janakiev (Macedonia).
RuralSchoolCloud, segundo
se fixo saber, baséase no intercambio de experiencias entre escolas
do rural de 6 países europeos, así como entre os axentes implicados
en deseñar programas innovadores e proporcionar contornas de
colaboración tanto para o alumnado como para os docentes. “A
partir delas, buscarase unha metodoloxía e ferramentas de traballo
comúns, nas que se aproveitarán as mellores solucións
desenvolvidas en proxectos anteriores, traballando sobre novas
posibilidades da computación na nube e outras solucións TIC que xa
se están a empregar nos centros educativos rurais europeos, con
diferentes sistemas educativos, idades e características
diferentes”, informa a Consellería de Cultura.