Os rapaces da Guarda gañadores da D3Mobile Metrology League reciben recoñecementos en Madrid

Os gañadores da primeira edición do certame D3Mobile Metrology League (dirixido a recoñecer a inventiva da nosa mocidade en materia de modelado de precisión en tres dimensións a través dos teléfonos móbiles) seguen a recibir distincións e recoñecementos. Os máis recentes foron os concedidos no Real Observatorio de Madrid e máis no Centro Español de Metroloxía. Cómpre lembrar que os vencedores do dito concurso, posto en marcha dende o grupo de investigación da Universidade de Santiago Uscan3D en colaboración coa Fundación Española para a Ciencia e a Tecnoloxía, son catro estudantes do IES A Sangriña, do concello da Guarda.
Estes alumnos, agrupados no equipo Tecnosang 4.2, tiveron os días pasados a oportunidade de coñecer de primeira man as ditas instalacións científicas e tecnolóxicas de Madrid, onde foron obsequiados (de man do Real Observatorio) con cadansúa tableta electrónica. O grupo está formado por Alicia Pereira, Olaia Ferreira, Carlos Baz e Saúl Álvarez, xunto co profesor do seu centro Antonio Lomba, que foi o encargado de coordinar e supervisar o traballo que desenvolveron ao abeiro da D3Mobile Metrology League. Neste concurso competiron con 1.126 estudantes de 4º curso da ESO e de Bacharelato de 136 centros educativos de toda España.