Os proxectos da aceleradora R DiCo Challenge mostrarán en xullo os avances obtidos
luns, 3 de xuño do 2019
- Foto de grupo da aceleradora de R, cos responsábeis de proxectos, os mentores e os representantes de R, AMTEGA e a TVG
Os
cinco proxectos que van participar en R
DiCo Challenge, a aceleradora de contidos dixitais da compañía
R, están xa a pleno rendemento, recibindo apoio e asesoramento e,
tamén, a piques de afrontar con cadanseus proxectos a que será a
recta final da primeira edición do programa, que culminará este mes
de xullo cunha xornada Demo Day. Nesta xornada, as iniciativas
finalmente elixidas para participar na aceleradora (Futboleando.gol,
Brain Games TV, Adivina Producciones, Visualización Big Data e
AliCE) mostrarán ao detalle os avances obtidos.
Como
lembraremos, os gañadores foron seleccionados dun total de 20
propostas polo comité avaliador do programa de startups da
operadora, integrado por dous representantes de R e dous da axencia
autonómica AMTEGA con asesoramento da compañía CRTVG, que
mentoriza un dos desafíos.
Amais
do impulso en si mesmo, as iniciativas están contar con cadanseu
mentor, axuda económica da axencia AMTEGA e o espazo startups
R (habilitado no Centro de Emprendemento da Cidade da Cultura) á súa
disposición, entre outras facilidades e servizos.
As
devanditas cinco propostas son as seguintes:
·
En resposta ao reto 1, enriquecemento de retransmisións de
eventos deportivos, o proxecto elixido foi Futboleando.Gol, de M
International. O piloto, mentorizado por Diego Rodríguez
Devesa, responsábel de contidos televisivos de R, propón un servizo
de retransmisión automatizada en diferido de partidos de fútbol
base, integrado coa plataforma de distribución de contidos de R e do
grupo Euskaltel.
·
Na contorna do reto 2, aplicacións para Android TV, foi
seleccionado o proxecto Brain Games TV, promovido por Cuicui Studios
e mentorizado por Antonio Ratón, responsábel de televisión
na área de Innovación de R e do grupo Euskaltel. A proposta é
desenvolver unha aplicación de Android TV de xogos de Brain Training
adaptados ao formato televisivo, integrada na plataforma de R.
·
Para o reto 3, contidos formativos e divulgativos innovadores,
escolleuse o proxecto de Adivina Producciones, FVR- Fila de Realidade
Virtual. Mentorizado por Leticia Sánchez, directora de
Televisión do grupo Euskaltel, FVR contempla o desenvolvemento dun
servizo viábel de retransmisión en diferido de contidos culturais,
especificamente teatrais, integrado na plataforma de contidos de R e
baseado en tecnoloxías de realidade virtual en 180a.
·
No reto 4, Big Data aplicado ao consumo televisivo, o comité
avaliador decidiuse pola proposta de Mario Pérez, Visualización Big
Data, que mentoriza Esther Medina, xefa do servizo de
Innovación da CRTVG. O proxecto consiste na posta en marcha dun
sistema de recolección e análise masiva de datos orientado á
mellora da programación televisiva.
·
Finalmente, no apartado de reto aberto escolleuse o proxecto AliCE,
(www.alicebiometrics.com),
promovido polo Centro Tecnolóxico Gradiant e mentorizado por
José Cadavid, responsábel de Plataforma e Big Data do grupo
Euskaltel. Desta volta a idea é desenvolver un piloto dun sistema de
retención de novos clientes utilizando tecnoloxías de recoñecemento
facial que eviten a suplantación de identidade (anti-spoofing)
para confirmar de xeito automático a identificación dos usuarios.
Defensa
e demostración: do Pitch Day ao Demo
Day
Os
cinco proxectos seleccionados competiron o pasado 7 de marzo nunha
xornada de pitching na Cidade da Cultura de Santiago, xunto
con outras quince propostas orientadas a algún dos cinco desafíos
tecnolóxicos da aceleradora para o programa deste ano. Tratábase de
convencer, nuns cinco minutos, da utilidade e viabilidade das
iniciativas, e de explicar de que maneira as levarían á práctica
cun plan de negocio.
Unha
vez coñecida a identidade dos cinco proxectos que pasan á fase de
aceleración, comezou este último treito do programa startups
R DiCo Challenge 2018-19. Os elixidos teñen á súa disposición
cadanseu mentor e poden optar á axuda económica da AMTEGA. Como
dixemos máis arriba, tamén poden empregar o espazo startups
R habilitado no Centro de Emprendemento da Cidade da Cultura,
traballar man con man con R, ter acceso á súa infraestrutura e
modelo de negocio e beneficiarse do uso das instalacións e a
visibilidade derivada de camiñar a carón do operador galego.
Ademais,
R converterase para eles “nun potencial primeiro cliente e nun
trampolín orientado a outras saídas comerciais ao mercado”.