Os politóns para o móbil, en perigo de extinción
luns, 25 de agosto do 2008
Por algo máis de 3 euros e uns cinco minutos
do noso tempo, podíamos (ata o de agora) levar no noso móbil as cancións
favoritas dos nosos grupos musicais en forma de politóns e facelas soar onde
queira que nos desprazaramos. Máis esta fonte de riqueza inesgotable para as
webs especializadas está destinada a desaparecer “en breve”, tal
e como informan no País de hoxe debido, entre outras cousas, á mellora
técnica dos terminais que permite que os usuarios descarguen directamente as
melodías da Rede ou do propio PC.
E é que se as ventas dos CD tradicionais están
a caer debido ó seu elevado prezo, o caso dos politóns aínda se agrava por
infrinxir as normas sobre protección aos consumidores, publicidade engañosa e
cobros indebidos.
A pesares de que no pasado 2007 os españois
enviaron 3.185 millóns deste tipo de SMS para descargar politóns, xogos ou
participar en concursos televisivos, as melodías para o móbil están “en franca decadencia” debido a que se
trata dun “produto obsoleto” tal e
como sinala Antonio Guisásola, presidente de Promusicae, a patronal
discográfica española.
Por outra banda, segundo un informe de GFK
sobre hábitos musicais, os adolescentes perciben que mercar música a través do
móbil suscita cada vez máis recelo, “porque
é caro e as cancións descargadas non se poden trasladar a outros dispositivos
como o iPod ou o PC”. Fronte a isto, os mozos e mozas españolas recurren ao
bluetooth ou directamente á Rede para
compartir música e deixan de solicitar politóns a través de sms como se viña
facendo abusivamente nos últimos anos.