Os obradoiros B-web amosan este xoves diferentes técnicas para converter a nosa web en algo visíbel
xoves, 13 de outubro do 2011
- Unha das anteriores actividades dos obradoiros, destinados a facilitarnos o camiño aos segredos das novas redes
Termos unha web
está moi ben, pero se non queremos que ninguén a vexa, para que tela? Saber os
principais métodos para dala a coñecer, entre auditorios específicos e facendo
fincapé no que nos interesa salientar, é unha das grandes materias pendentes de
todos aqueles que se gaban de ter un anaquiño de Rede. Isto que é importante a
nivel de usuario, adquire especial relevancia entre as empresas. Co obxectivo
de botarlles unha man nesta tarefa de poñer a web en sitio visíbel, EXPOCoruña organiza este xoves 13 de outubro
o seu segundo obradoiro B-web: Como
posicionar a túa páxina web.
O obxectivo, como
dixemos, é achegar as habilidades necesarias para mellorar o posicionamento da
nosa web e con isto aumentar o tráfico que vén dos buscadores. Segundo nos
contan dende EXPOCoruña para ir situándonos a nós tamén en materia, o posicionamento
en buscadores, posicionamento web ou optimizador de motores de busca (SEO nas
seu acrónimo en inglés) “é o proceso de
mellora da visibilidade dunha web en buscadores de maneira orgánica, é dicir, sen
ter que pagar ao buscador por esta posición”. Ou sexa, que figurar nas
primeiras posicións de Google “resulta
indispensable xa que este buscador responde case ao 60% das buscas en Internet”.
Neste novo
obradoiro B-web aprenderemos a situar a nosa páxina web no mellor sitio posíbel
e a aumentar o tráfico procedente de buscadores, amosándose como conseguir que
este tráfico sexa o máis relevante posible. Asemade, tamén se exporán algunhas
ferramentas que permiten controlar a evolución do posicionamento e así poder
realizar un seguimento das melloras. Este obradoiro será impartido por Ismael El-Qudsi. Traballa en Havas Digital
como Head of New Media (SEO, Redes Sociais, Blogs, Innovación...) tralo seu paso
por MSN durante 3 anos foi search manager
e responsable de Live.com. Previamente traballou durante 5 anos en TPI, por
exemplo, no proxecto do buscador NOXTRUM. A nivel particular foi responsable
dalgúns proxectos de Internet como a web de opinións Vootar.com e organizou o
evento Internet es Tuyo.