Os novos iPad Pro poderían chegar lixeiramente dobrados de fábrica

Co incremento de tamaño dos iPhone 6 e 6 Plus en 2014 xurdiu o bendgate, un escándalo relativo a un problema que consistía na facilidade dos terminais a dobrarse, que un par de anos despois demostrou ser causante de avarías nos dispositivos, levando a que Apple lanzase un programa de reparación para o iPhone 6 Plus; e agora semella estar a repetirse a historia cos novos iPad Pro, que teñen un tamaño bastante grande, pero un grosor moi reducido.
Están a rexistrarse bastantes casos de tabletas de Apple que están a chegar a mans dos consumidores co seu chasis de aluminio lixeiramente dobrado, o que dende Apple aseguran que é consecuencia do seu proceso de fabricación, rexeitando que sexa un defecto por non ter consecuencias prácticas, aínda que haberá que ver se iso é realmente así (lembremos que co iPhone 6 Plus tardaron anos en recoñecer o problema).
Segundo Apple o dobrado do iPad Pro é o resultado do proceso e arrefriamento que involucra compoñentes de plástico e metal durante a fabricación do dispositivo, xustificación que non semella moi aceptable para un trebello que venden a prezos de entre 879 e 2.099 euros en función da súa configuración (de feito, os modelos máis caros, os que inclúen conectividade móbil, serían os que máis acusan o dobrado).
En distintos foros están a xurdir usuarios que aseguran que o dobrado do seu iPad Pro non chegou de fábrica, senón que produciuse de xeito progresivo, simplemente co uso diario da tableta, o que si sería máis preocupante, pois indicaría que a súa resistencia á torsión é menor da debida, e podería dar problemas a longo prazo.
Queda agora por ver se Apple aceptará a súa responsabilidade ante este tipo de incidencia, e substituirá as unidades que estean seriamente afectadas, ou ignorará o asunto, de xeito que terán que ser os usuarios os que teñan coidado no momento da compra para mirar de quedar cun dispositivo nas mellores condicións posibles.