Os nosos sectores turístico e tecnolóxico xuntaron enerxías na xornada Loop Congress
venres, 28 de febreiro do 2020
Este
xoves 27 de febreiro celebrouse en Santiago, na Cidade da Cultura, a
primeira edición dun encontro que chegou para quedar e medrar: a
Xornada de Turismo e Tecnoloxía Loop Congress, un evento
organizado conxuntamente polo Clúster TIC de Galicia e o Clúster de
Turismo de Galicia coa colaboración do IGAPE, Turismo de Galicia e a
Xunta. A xornada, que contou coa presenza dun centenar de
profesionais do ámbito das TIC e do turismo, serviu entre outras
cousas para afianzar colaboracións entre os dous sectores e sentar
os alicerces de futuros e prometedores proxectos.
O
conselleiro de Cultura e Turismo, Román Rodríguez, destacou na
clausura do evento “a aposta polo turismo intelixente e innovador
como clave do desenvolvemento do sector durante os próximos anos”.
Álex
López, que se atopa entre os persoeiros con máis influencia mundial
en materia de redes e ecommerce, sinalou na súa intervención
como “a venda social impulsa a creación de conversas online
para atraer a potenciais clientes”, un concepto que cambiou a
concepción da mercadotecnia en redes sociais. “Instagram é un
lugar perfecto para as empresas turísticas”, indicou, destacando
diferentes ferramentas para explotar todas as posibilidades desta
canle social.
Pola
súa banda, o experto en análise de datos a gran escala e
vicerreitor de Relacións Internacionais da Universidade de Deusto,
Álex Rayón, puxo o foco na economía dos datos e no seu potencial
para revolucionar o mundo da tecnoloxía, porque, dixo, “pódense
manexar volumes de datos masivos cos que estudar o comportamento dos
usuarios en tempo real, ademais de coñecer as súas preferencias
dunha forma máis precisa”. Amais, sinalou, “esta tecnoloxía
permite, por exemplo, recomendar rutas turísticas personalizadas ou
afacer o programa dun festival de música aos gustos da audiencia
reflectidos nos datos das aplicacións musicais”.
Na
mesa redonda sobre a preparación do sector turístico ante as
tecnoloxías que marcan un antes e un despois participaron o director
executivo e co-fundador da Axencia Pilgrim, Roberto Fraga; o
presidente do Consorcio de Empresarios Turísticos de Sanxenxo,
Alfonso Martínez Cacheda; e o director da empresa tecnolóxica
Sixtema, Alejandro Lamas, coa moderación de Manuel Veloso, da
secretaría técnica do Clúster de Turismo de Galicia.
Roberto
Fraga fixo fincapé na necesidade “dun cambio na capacitación
profesional de raíz, baseada en competencias”. Pola súa banda,
Martínez Cacheda indicou que “as tecnoloxías permiten chegar aos
pequenos a sitios onde só poden chegar os grandes, sempre, empezando
por un bo diagnóstico de base”. Alejandro Lamas salientou a
relevancia de “atendermos aos mecanismos dos movementos
tecnolóxicos, facendo vixilancia tecnolóxica, avaliando o que
resulta de interese e que non”.
Loop
Congress contou tamén coa visión da administración no sector
turístico en Galicia da man da responsábel da área de
Competitividade de Turismo de Galicia, José Luis Maestre; do
responsábel da área de Innovación de Turismo de Galicia, Jorge
Barreiro; do xerente da Mancomunidade do Salnés, Ramón García
Guinarte, e do responsábel de Transparencia e Goberno Aberto da
Deputación de Ourense, Fernando Súarez.
Durante
o coloquio, moderado polo representante da mesa de turismo no comité
de dirección do Clúster TIC de Galicia e director executivo de Dos
Espacios, Santiago Paz; o xerente da Mancomunidade do Salnés
destacou varios proxectos públicos baseados no concepto de Cidades
Intelixentes e resaltou as posibilidades que ofrece a segmentación
para facilitar información ao cidadán desde as administracións.
Fernando Súarez lembrou a necesidade de “enriquecer a experiencia
turística, antes e despois da visita, a través de ferramentas
tecnolóxicas”. Pola súa banda, Jorge Barreiro expuxo a estratexia
Smart Turismo de Turismo de Galicia, baseada nun tecido de portais,
aplicacións para dispositivos móbiles, redes sociais, oficinas de
turismo e visitas virtuais e 3D.
Loop
Congress pechou a súa primeira edición cunha sesión de networking
na que participaron empresas de ambos os sectores representados.