Os informáticos salientan os pasos dados polo Goberno para equiparalos ao resto das enxeñerías
venres, 16 de xuño do 2017
- Fernando Suárez, presidente do CPEIG, e Marcos Mata, presidente do CPETIG, nunha imaxe recente de Marcus Fernández
Unha
reclamación que vén de antigo e na que teñen participado arreo os
nosos colexios de informática (o CPEIG e o CPETIG), semella que está
xa no camiño definitivo de ser atendida. Falamos dos
repetidos chamamentos feitos polos colectivos estatais e autonómicos
para evitar que os regulamentos de servizos profesionais prexudicasen
a Enxeñaría Técnica e á Enxeñaría en Informática en relación
ao resto das enxeñarías (a Lei deixábaos excluídos de
importantes garantías, dereitos e recoñecementos do seu labor
actual e da experiencia que acubillan tras eles). Porén, segundo nos
contan os consellos estatais CCII (no que se integra o CPEIG),
CONCITI (no que se integra o CPETIG), CODDII e RITSI, o
Goberno está a dar “os primeiros pasos para a devandita
equiparación profesional”. As entidades, de de feito, valoran
“positivamente” este avance e agardan que “remate cos agravios
producidos tanto a nivel profesional como académico”.
A
confirmación veu da Secretaría de Estado para a Sociedade da
Información e a Axenda Dixital e reflicte a vontade do Ministerio de
informar positivamente en relación coa inclusión dos enxeñeiros en
informática e enxeñeiros técnicos en Informática no Anexo VIII do
Real Decreto 1837/2008.
Segundo
informan as ditas entidades profesionais, académicas e estudantís,
malia non ser incluídos no Real Decreto que actualiza o Real Decreto
1837/2008 traspondo a Directiva 2013/55/UE sobre recoñecemento de
cualificacións profesionais, adición que se demandou e séguese
demandando polos representantes da profesión (CCII e CONCITI), da
universidade (CODDII) e dos estudantes das titulacións ligadas á
Enxeñaría e Enxeñaría Técnica en Informática (RITSI), o novo
regulamento prevé “a creación dunha comisión interministerial
que debe corrixir este feito de acordo ao manifestado cara aos
consellos xerais por parte do Ministerio”.
Para
os profesionais, a universidade e os estudantes destas titulacións
representados en CCII, CONCITI, CODDII e RITSI, non se “pode nin se
debe demorar máis a solución ao colectivo”, tendo en conta “o
problema que se suscita cada vez que aparece un novo texto legal que
afecta ao exercicio profesional, ao recoñecemento destes
profesionais, ás taxas de máster e ao acceso a bolsas destes
estudantes”. Por iso, esperan que “o Ministerio concrete
proximamente os pasos que se van a dar nunha folla de ruta con
obxecto de terminar dunha vez coa anormal situación regulamentaria
que provoca este agravio dos estudantes e profesionais das enxeñarías
informáticas, respecto ao resto de enxeñarías”.