Os impulsores de iWeekend encherán este venres a zona do Obelisco da Coruña de ideas innovadoras
xoves, 13 de xuño do 2013
A
iniciativa iWeekend segue a estender as súas pólas. Se hai pouco
falabamos
da súa estrea galega cunha xuntanza de traballo en rede na sede de
WeKCo (unha cita cun escenario concreto e pechado), agora é a
quenda de rastrexar as súas ramificacións na propia cidade da
Coruña, na procura de saírlle ao paso á propia cidadanía e
facer convocatoria de cara á súa vindeira cita de traballo en rede.
Máis polo miúdo, falamos da proposta dos responsábeis da iWeekend
(eventos nacionais e de carácter mensual que agora afiánzanse na
nosa terra) para converter a zona do Obelisco, o vindeiro venres a
partir das 11.00 horas,
nunha factoría de ideas empresariais e innovadoras. A iniciativa,
malia ser fonte de ideas, será visíbel para todas e todos.
De
feito, terá feitura de instalación informativa, feita con caixas de
cartón reciclado e nela poderemos ver en que consiste iWeekend, como
funciona e como evolucionan os proxectos que participaron ao seu
abeiro. A idea desta cita no Obelisco é, como dixemos, saírlle ao
paso á cidadanía. Así, calquera poderá interactuar co evento
iWeekend, sacándose unha fotografía incluíndo, de palabra e
por escrito,
as ideas emprendedoras que se lle ocorran ou ben enchendo con elas un
gran mural de notas de tres metros de longo e dous de alto, e todo
para tentar acadar unha inscrición de balde ás xornadas que se van
celebrar os días 21 e 22 de xuño, desta volta no Centro
Universitario de Riazor e contándose coa colaboración dos
empresarios novos locais, AJE A Coruña.
A
iniciativa do Obelisco xa comezou, en realidade, cos organizadores
anunciando con códigos QR as súas actividades, repartidos por toda
a cidade, e lembrando que a inscrición está
aberta na páxina de seu. Asemade lánzase a mensaxe fundamental
da proposta iWeekend Innova e Crea: reunir a persoas que buscan
oportunidades (profesionais e estudantes) con persoas que as ofrecen
(empresarios, autónomos e emprendedores) para que traballen xuntos,
“a
través dunha experiencia e motivadora dun día e medio de duración”.
O
programa está
dirixido tanto a
aqueles que queiran presentar unha idea empresarial, desenvolvela,
reorientala ou buscar solucións a algún problema, como para os que
só desexen asistir ao evento en busca de contactos, inspiración e
coñecementos de alto valor engadido. “En
calquera caso, todos gañan”,
engaden
os organizadores.