Os futuros talentos do audiovisual galego gradúanse en Lugo da man da Deputación
xoves, 20 de xuño do 2019
- Un intre dos preparativos da gala celebrada hoxe
O
presidente da Deputación de
Lugo en funcións, Darío Campos Conde, clausurou este xoves o
curso 2018-2019 do Centro
de Formación do Servizo de Audiovisuais da entidade provincial.
Fíxoo nun concorrido acto (coa presenza dos estudantes e dos seus
familiares e amigos, e tamén con colaboradores e representantes do
sector) e na compaña do voceiro do Goberno en funcións, Álvaro
Santos Ramos, e da edil do Concello de Lugo, Ana González Abelleira.
Campos
felicitou aos 20 novos titulados e ao alumnado de primeiro de
Produción e Realización encargado de organizar e gravar a gala de
graduación que, por vez primeira, celebrouse no Centro de Produción
Audiovisual do devandito Servizo. A gala, inspirada no cinema en
branco e negro, contou cunha actuación de claqué a cargo de Lola
Fernández.
Campos
Conde convidou ás alumnas e alumnos a que “nesta nova andaina
soñedes moito e traballes aínda máis”. E engadiu: “Nós
puxemos os medios, e de vós e da vosa implicación depende o partido
que lle saquedes ao voso paso polo Centro de Formación Audiovisual”.
O presidente tamén lembrou que “desde a Deputación sumámonos ao
esforzo das familias mantendo a matrícula de balde co obxectivo de
que calquera rapaz ou rapaza da nosa provincia que lle guste o mundo
audiovisual poida acceder a un ensino de calidade, con independencia
da súa situación económica”.
Nos
últimos anos a Deputación de Lugo vén apostando fortemente polo
sector, como se reflicte da súa presenza activa no Clúster do
Audiovisual Galego e na Academia Galega do Audiovisual. Ademais, vén
de convocar catro contratos en prácticas para realizadores e
produtores para que se inicien dun xeito profesional neste ámbito.
Seguindo
este fío do compromiso creativo da entidade provincial, Campos Conde
salientou o apoio da Deputación a “películas de proxección
internacional”, como O que arde, de Oliver Laxe, rodada en
galego e maioritariamente nos Ancares Lucenses, que vén de ser
premiada no Festival de Cannes; ou a colaboración na longa La
sombra de la Ley, con varios premios Goya, e con tres lucenses á
cabeza: o director Dani de la Torre, o responsábel da montaxe, Jorge
Coira, e o actor Luis Tosar. “Exemplos de que desde Lugo tamén se
pode chegar ao máis alto no mundo do cine”, dixo.
Gala
en branco e negro
O
alumnado de primeiro de Produción organizou a gala de graduación,
inspirada no cine en branco e negro, como práctica dentro do módulo
de Planificación de Proxectos de Espectáculos e Eventos. As rapazas
e rapaces de primeiro de Realización foron os encargados da súa
gravación íntegra. O encontro incluíu ademais un photocall
na entrada do CPA e un museo con diversos recordos dos alumnos
durante estes dous últimos anos.
Durante
a velada proxectáronse algúns dos traballos elaborados polos novos
titulados no último curso: os videoclips Mi monstruo favorito
do grupo Kimuru e 666 de Sad Gonsales; e as curtametraxes
Primer beso e Quero ser romano. O alumnado tamén
realizou e produciu, ao longo do ano, diversos programas de
televisión e a Semana de Teatro con espectáculos representados,
producidos e realizados polos estudantes, entre outros traballos.
Prazos
para matricularse o curso que vén
O 28
de xuño remata o prazo de preinscrición para o curso 2019-2010, que
está aberto desde o día 17. A listaxe provisional de admitidos, de
solicitantes que quedan en lista de espera e de excluídos
publicarase o 2 de xullo no taboleiro de anuncios do centro e en
www.fundaciontic.org. O 3
e 4 estará aberto o prazo de reclamacións e o día 5 publicarase a
listaxe definitiva. A matrícula ordinaria poderá formalizarse desde
o 8 ao 19 de xullo, na sede do centro educativo en horario de 9.00 a
14.00 horas. Tanto o impreso como a documentación correspondente,
poden descargarse en www.fundaciontic.org.