Os fogares de Oleiros poderán traballar nun uso das TIC en positivo grazas ao obradoiro familiar municipal
venres, 4 de marzo do 2022
O
Concello
de Oleiros vai organizar unha nova edición do seu obradoiro Familias
Inquedas, dirixido a fogares con adolescentes. Nesta nova
convocatoria porase o foco nos novos escenarios de actuación e
comunicación, apostando por fomentar a empatía, a igualdade, o
respecto polos demais e o uso racional, útil e seguro das novas
tecnoloxías. O prazo para participar abre o 7 de marzo. Porase o
foco nas consecuencias que tivo a pandemia nas novas xeracións, logo
do confinamento e dunha maior presenza das canles online.
O
obradoiro Acompañando á adolescencia” está dirixido a
familias de Oleiros con menores de 11 a 17 anos de idade. As sesións
serán os luns e xoves nas seguintes datas: o 14, 17, 21, 24, 28 e 31
de marzo e o 4 e o 7 de abril. As inscricións serán a través da
sede electrónica na web municipal
no apartado cidadáns e empresas/trámites en liña, a partir do luns
7 de marzo ás 10:00 h e ata o xoves 10 de marzo ás 23:00 h. O
número de prazas é limitado, que se asignarán por rigorosa orde de
inscrición, tendo preferencias as persoas que non participaron nesta
actividade en anos anteriores.
Será un obradoiro de 16 horas, dividido en 8 sesións en formato
presencial que se desenvolverá en Villa Echeverry, as novas
instalacións en Perillo de Servizos Sociais e Igualdade. Estará
impartido por Sara Vierna, de Almas Meraki, unha profesional con
ampla experiencia en traballar con adolescentes e familias temas de
educación emocional, igualdade, sexualidade e novas tecnoloxías.
Este tipo de obradoiro enmárcase dentro da estratexia de
desenvolvemento comunitario de boas prácticas na educación e na
crianza no entorno familiar, “cun enfoque preventivo de conflitos
familiares e de problemáticas que poidan xurdir nos fogares de
Oleiros”.
Segundo
explica o Concello acerca dos porqués deste obradoiro, “o contexto
actual provocado pola COVID 19 fixo máis necesario que nunca
traballar a convivencia e a comunicación na familia, no que a
pandemia deixou un pouso de desánimo, desmotivación e apatía na
adolescencia”.