Os estudos aeroespaciais da UVigo rompen coa fenda de xénero nas carreiras STEM
martes, 13 de decembro do 2022
A
Escola de Enxeñaría Aeronáutica do Campus de Ourense (UVigo) vén
de facer balance da presenza de mulleres nas súas carreiras STEM
(acrónimo de Ciencia, Tecnoloxía, Enxeñaría e Matemática) e o
primeiro que chama a atención é o claro distanciamento que acadan
as súas cifras con respecto á media estatal. Así, mentres que en
España a cifra de mozas que escollen estudar estas carreiras é de
arredor dun 15%, no
Grao en Enxeñaría Aeroespacial, da Escola de Enxeñaría
Aeronáutica e do Espazo do Campus de Ourense, os números rozan a
paridade. Este ano, ademais de repetir como un dos títulos con
maior demanda e maior nota de acceso no Sistema Universitario de
Galicia, conta cun 45% de mulleres en primeiro curso.
“Esta
é unha cifra récord na traxectoria da nosa escola pero tamén é
unha cifra extraordinariamente boa no contexto das carreiras STEM no
que nos movemos. Realmente sorprendeunos gratamente”, sinala Nieves
Lorenzo, secretaria do centro e responsábel de Igualdade nel.
Segundo lembra, a taxa de alumnas oscilou desde a posta en marcha da
escola entre un 30% nos seus inicios e un 25% nos últimos anos.
Sobre a excepcionalidade da case paridade acadada no alumnado que
comezou este curso, sinala que “quizais sexa moi axiña para saber
se se debe ao esforzo feito nos últimos anos para romper esta fenda
de xénero pero si é certo que está habendo un esforzo importante
por parte das institucións universitarias para atraer alumnas ás
carreiras nas que teñen unha menor representación e tamén é certo
que desde colexios e institutos reclaman esas iniciativas con forza”.
Entre estas iniciativas apunta eXXperimenta en Feminino, nada nas
facultades de ciencias e enxeñaría do Campus de Ourense, entre elas
Enxeñaría Aeronáutica e do Espazo, e centrada na promoción,
reivindicación e posta en valor de referentes femininos no eido
STEM.
Pola
súa banda, Humberto Michinel, director da Escola de Enxeñaría
Aeronáutica e do Espazo de Ourense, destaca a satisfacción do
centro por acadar esta cifra e ter éxito na captación de alumnado
excelente non só masculino senón tamén feminino. “É certo que
nas carreiras denominadas STEM non é habitual ter paridade pero nós
temos feito un grande esforzo neste senso”, poñendo en valor de
xeito particular o “o excelente traballo” da profesora Nieves
Lorenzo. Neste senso, destaca que iniciativas como eXXperimenta en
Feminino “teñen sido moi importantes para ir incrementando
paulatinamente a porcentaxe de alumnas que, se ben inicialmente non
era baixa, foi medrando ata case o 50% actual”.