Os establecementos de Padrón incrementan a súa visibilidade grazas ao marketplace local
luns, 12 de abril do 2021
O
Concello de Padrón vén de facer un breve balance do acadado en
materia de revitalización comercial a través do servizo de
marketplace posto en marcha o verán pasado, a través do Plan
de Reactivación da Concellería de Turismo e co obxectivo de axudar
ao tecido produtivo padronés a promover produtos e ofertas.
Segundo
fai saber este departamento, o comercio foi quen de ampliar a súa
visibilidade grazas á ferramenta, ao tempo que foi capaz de
incrementar o número de clientes e, tamén, as opcións de
comunicación e interacción cos residentes e visitantes.
“Animo
a todas as persoas que dirixen un comercio en Padrón a darse de alta
nesta plataforma para mellorar as vendas do seu negocio, posto que
deste xeito poderán informar a toda a súa posíbel clientela de
todas as ofertas que teñan vixentes e, sen dúbida, fomentarán as
compras”, incidiu Lorena Couso, concelleira de Turismo.
A
nova plataforma, na que os distintos comercios de Padrón poderán
anunciar os seus produtos e ofrecerlles un interesante abano de
opcións aos seus potenciais clientes, está dispoñíbel
marketplace.padronturismo.gal.
Como
darse de alta
O
Concello tamén explicou como darse de alta aos establecementos
interesados en adhersirse. Segundo fixo saber, o rexistro
de novos locais faise na propia plataforma, onde haberá que
premer en Engadir Comercio e dende aí cubrir o formulario de
inscrición así como engadir fotos e información adicional (nome,
datos de contacto, actividade, redes sociais, fotografías, horario,
promocións, ofertas, etc) para que, posteriormente, se valide por
parte da Oficina de Turismo.
