Os escolares galegos contan as horas para recibir a Papá Noel por videoconferencia
luns, 13 de decembro do 2010
A Secretaría
Xeral de Medios xa o vén anunciando dende hai semanas: “as nenas e nenos galegos van a ter o privilexio de falar con Papá Noel
a través de videoconferencia para pedirlle os seus agasallos en persoa antes
que ninguén”.
Poderán facelo
ata o vindeiro venres, 17 de decembro, dende o Centro Multimedia de Galicia,
onde se proporcionará o soporte técnico para realizar as conexións directamente
con Laponia.
Estas terán
lugar en 25 localidades galegas, nas que os máis cativos da casa poderán facer
as súas peticións de Nadal directamente e sen intermediarios botando man das
novas tecnoloxías.
As agardadas
videoconferencias darán comezo hoxe mesmo, a razón de media hora en cada telecentro. Escolares de
Educación Infantil de Muros, Ourense, Xinzo, Celanova e Tui serán os primeiros en
recibir esta inusual visita, porén a rede de aulas de comunicación multimedia
que hai dispersa pola xeografía galega tamén permitirá que os nenos e nenas de Lalín,
A Estrada, Fonsagrada, Betanzos, Abegondo, Vimianzo, Brión, Verín, Negreira, A
Cañiza, Vedra, Marín, Foz, Guitiriz, Oroso, O Barco, Catoira, Quiroga, Carballo
e Becerreá poidan realizar as súas peticións de Nadal nos vindeiros días.
O obxectivo
desta actividade, que conta cun gran interese entre a comunidade educativa,
será o de establecer unha comunicación fluída e cara a cara entre Papá Noel e
os nenos destas comarcas, poucos días antes da Noiteboa, cando se atendan as
peticións de agasallos de todos os nenos do mundo.
Na imaxe, a oficina de Papá Noel en Laponia.