Os enxeñeiros galegos de Telecomunicación entregan os seus premios o 20 de outubro na Coruña
mércores, 27 de setembro do 2023
O
Colexio Oficial e a Asociación de
Enxeñeiros de Telecomunicación de Galicia vén de publicar o
fallo dos Premios Galicia das Telecomunicacións e da Sociedade da
Información 2023, que este ano volverán recoñecer o traballo de
empresas, institucións e persoas no desenvolvemento das Tecnoloxías
da Información e a Comunicación (TIC) tanto en territorio galego
como máis aló das nosas fronteiras. A entrega de premios
realizarase, como é tradición, no marco da gran gala que a
comunidade de telecos celebra cada ano: A
Noite Galega das Telecomunicacións. A XXVII edición do evento
terá lugar o 20 de outubro no Hotel Finisterre da Coruña.
Na
Noite Galega das Telecomunicacións é unha cita anual na que o
colectivo galego de enxeñeiras e enxeñeiros aproveita para
profundar nos grandes retos tecnolóxicos aos que se enfronta
Galicia. Unha reflexión colectiva na que participan empresas,
patrocinadores, institucións e, por suposto, persoas a título
individual. Enxeñeiros de Telecomunicación, pero tamén destacadas
personalidades que son un referente no universo tecnolóxico da
comunidade. En total, máis de 250 persoas reuniranse o 20 de outubro
no Hotel Finisterre de A Coruña para facer networking,
compartir bos momentos e analizar as profundas transformacións dunha
era chea de desafíos e oportunidades.
Este
ano, A Noite centrarase precisamente nun dos máis relevantes. Baixo
o lema Enerxías Intelixentes, o colectivo quere pór o foco
nos retos desencadeados pola sustentabilidade e o cambio estrutural
do modelo enerxético, unha nova folla de roteiro definida en gran
medida polo papel que xa están a xogar as tecnoloxías.
Premios Galicia das Telecomunicacións e da Sociedade da Información 2023
Premio Enxeñeiro do Ano
- José Luis Fernández Carnero
José Luis Fernández Carnero, director xeral
de Estratexia da Televés Corporación, recibirá este ano o galardón
pola “súa extensa carreira profesional e a súa decidida achega ao
desenvolvemento tecnolóxico de Galicia”, sinalou o xurado. Desde
1981 desenvolveu a súa carreira profesional como directivo en
Televés, unha das grandes multinacionais galegas e un referente
tanto na área do deseño e fabricación de produtos tecnolóxicos de
alto valor no ámbito das telecomunicacións como no eido da
internacionalización. Vigués de nacemento, José Luis Fernández
Carnero escribiu libros e multitude de artigos técnicos que o
converteron nunha referencia dentro do ámbito da innovación e o
universo TIC, un protagonismo que o levou a ocupar responsabilidades
tan relevantes como a vicepresidencia da Fundación Gradiant ou a da
Comisión de Industria de AMETIC.
Premio AMTEGA ao Mellor Proxecto TIC con Beneficios Sociais
- Unha das actividades de Talentos Inclusivos
O proxecto Talentos Inclusivos foi distinguido con este recoñecemento
polo seu decidido enfoque na solución dun problema concreto: atender
as necesidades especiais das persoas afectadas polo dano cerebral.
Talentos Inclusivos é un proxecto do CITIC (Centro de Investigación
en Tecnoloxías da Información e as Comunicacións) da Universidade
da Coruña (UDc) e ASPACE promovido pola FECYT (Fundación Española
para a Ciencia e a Tecnoloxía). No marco do mesmo, alumnado de
Secundaria e Bacharelato de varios institutos de Galicia traballou na
procura de solucións tecnolóxicas ante unha serie de retos expostos
polos usuarios de ASPACE. Así explica o xurado os porqués do
recoñecemento: “Trátase dunha valiosa iniciativa educativa cunha
vocación dual. Por unha banda, o traballo dos alumnos foi un
poderoso catalizador para espertar vocacións STEM entre os mozos á
vez que se lles sensibilizaba sobre as necesidades e problemas das
persoas con parálise cerebral. E todo iso, impulsado dentro dun
marco de traballo totalmente colaborativo e de equipo enfocado desde
un punto de vista netamente tecnolóxico. Por outra banda, Talentos
Inclusivos permitiu explorar na vertente práctica da tecnoloxía
desenvolvendo aplicacións e ideas que atendan as necesidades
específicas das persoas afectadas polo dano cerebral”.
Premio Mellor Expediente académico do Mestrado en Enxeñaría de Telecomunicación da Universidade de Vigo
- Marielena Márquez Barreiro
Marielena Márquez
Barreiro recibirá este galardón na gala deste ano polo seu
envexable expediente académico. Non en balde, recibiu a máxima
cualificación media do mestrado de Enxeñaría de Telecomunicación
ao longo do curso pasado. Marielena está a traballar actualmente no
Centro Tecnolóxico Gradiant como enxeñeira investigadora. En
concreto, na Liña de Cloud-Native Technologies, investigando e
integrando tecnoloxías cloud-native para a xestión da
despregadura e orquestración de servizos e aplicacións en diversos
ámbitos, como as redes móbiles 5G ou modelos de Intelixencia
Artificial. O seu traballo céntrase nos modelos e arquitecturas de
Cloud e Edge Computing, utilizando tecnoloxías como
Docker ou Kubernetes.
Premio Axians á Entidade Galega que aposta polo desenvolvemento de Infraestruturas Intelixentes de Telecomunicacións
- Manuel González Penedo, director-coordinador do CITIC
Liderado na
innovación e o desenvolvemento e despregadura das tecnoloxías TIC a
través do CITIC, do Campus Innova da Cidade das TIC e unha decidida
e valiosa contribución para lograr que A Coruña fose designada para
albergar a Axencia de Supervisión da Intelixencia Artificial
(AESIA). Estes foron os dous poderosos argumentos que levaron á
concesión á Universidade da Coruña do Premio Axians. Unha
distinción que pon en valor “o impulso e a enerxía que empregou a
institución na creación dun ecosistema tecnolóxico que será clave
para a Galicia do futuro”.
Premio Vantage Towers ao Mellor Proxecto TIC para a Sustentabilidade e Coidado da Terra
- Miguel Ángel López Pena, director de Innovación de SATEC
O proxecto Vid-Expert impulsado pola
consultora tecnolóxica SATEC recibiu o premio Vantage Towers pola
“súa valiosa achega na redución da pegada de carbono dentro do
sector da viticultura”. Vid-Expert é unha ferramenta tecnolóxica
de alto nivel que, apoiándose na Intelixencia Artificial e o Big
Data, non só cuantifica as emisións de carbono
das adegas e os viñedos, senón que realiza recomendacións para
reducilas e, por tanto, “traballa dunha forma moi activa na
sustentabilidade e o coidado do medio ambiente”, salienta o xurado,
engadindo que o proxecto de I+D+i, de feito, “supoñerá unha
valiosa contribución ao sector por canto os actuais protocolos para
o cálculo de pegada de carbono utilizados na actividade vinícola
son de difícil emprego”.
Premio Socio de Honra
- O avogado e divulgador especializado nas TIC Víctor Salgado
O Colexio Oficial e a Asociación de Enxeñeiros de Telecomunicación de Galicia decidiron romper un tanto a tradición deste premio para poñer en valor o perfil e a traxectoria de Víctor Salgado Seguín, avogado especializado en dereito tecnolóxico. “Salgado Seguín, socio director en Pintos & Salgado Avogados, é un recoñecido experto na normativa relacionada coas TIC e en todo o que ten que ver tanto coas cuestións xurídicas como coas súas consideracións éticas”, destaca o COETG, salientando que “o seu traballo en ámbitos como a salvagarda dos dereitos das empresas no universo dixital ou a defensa dos dereitos dos cidadáns na Rede leváronlle, entre outros méritos, a recibir a consideración do colectivo de telecos”.