Os desafíos da condución autónoma centraron o novo hachathon 5G da UVigo
xoves, 24 de marzo do 2022
A
Escola
de Enxeñaría de Telecomunicación acolleu este mércores 23 un
hackathon 5G, o terceiro das súas características que
acolle o centro no prazo dun ano. Foi unha competición na que se
retou ao alumnado a resolver diferentes retos tecnolóxicos
empregando tecnoloxía 5G que aínda non está dispoñíbel no
mercado, pero que “en breve formará parte del”, informaron dende
a organización, engadindo no primeiro hackathon, celebrado o
pasado verán, o desafío xiraba en torno á Realidade Aumentada; no
segundo, en decembro, na Industria 4.0. O último, que se prolongo
durante toda a xornada do mércores, puxo o foco no mundo da
condución autónoma.
Organizado
ao abeiro do Plan Nacional 5G Teleco-Vigo, financiado por Red.es, as
actividades arrancaron a primeira hora da mañá nunha presentación
que contou coa participación da directora da escola, Rebeca Díaz; o
responsábel académico da competición, Felipe Gil, profesor e
investigador de AtlantTIC, e Xosé Ramón Sousa, responsábel de
Innovación de Optare Solutions, empresa que colaborou na
organización dunha proba que, nesta ocasión, estivo moi vinculada a
proxecto piloto 5G que converteu a Vigo na primeira universidade
galega en probar as vantaxes da tecnoloxía 5G para lograr un smart
campus.
Nesta
edición participaron no hackathon tres grupos compostos por
12 alumnos de 3º e 4º curso do Grao en Enxeñaría de Tecnoloxías
de Telecomunicación. Pola mañá tiveron diferentes actividades
formativas á espera da competición propiamente dita que se prolongo
até última hora da tarde. O reto consistiu en completar un circuíto
de condución mediante o control remoto dun coche a través da rede
5G de Orange. Na actividade probáronse as tecnoloxías de Edge
Computing na propia rede comercial de Orange co obxectivo de ver como
se pode implantar toda a tecnoloxía relacionada co coche conectado.