Os custos do largo de banda poderían agrandar a fenda dixital
martes, 28 de abril do 2009
- O gasto en largo de banda en países non rendibles comeza a ter un peso moi importante para os portais con contidos multimedia
O The New York
Times publicou onte un artigo
no que falan sobre o paradoxo da internacionalización, no que comentan cómo
o feito de que Facebook estea a medrar a moita velocidade en Turquía e
Indonesia, como tamén fai YouTube na India e no Brazil, non é unha nova tan boa
coma perece, pois dar servizo a estes países resulta moi caro xa que consumen
moitos recursos pero apenas producen ingresos publicitarios, polo que serían
claramente deficitarios aínda que só atendésemos ao gasto en largo de banda que
xeran.
Esta situación podería crear unha nova fenda dixital que sería preocupante,
pois separaría aos países en vías de desenvolvemento do resto, de seguirse os
pasos de compañías coma Veoh, un servizo de publicación de vídeos, que bloqueou
o seu acceso dende África, Asia, América Latina e Europa do Este, para evitar
os altos custos da entrega de vídeos a estas rexións. Dende a compañía
aseguraron que están a favor das «comunicacións
abertas» pero tiveron que tomar esta medida por non ser capaces de
rendibilizar este consumo esaxerado de largo de banda por un mercado do que non
conseguen ingresos. A filosofía do todo
gratis na Internet está baseada na publicidade, e esta apenas existe en
moitos mercados que poderían quedar agora marxinados.
Dende MySpace decidiron empregar unha solución intermedia, e así, están a
traballar nunha versión reducida do
seu servizo para países con accesos lentos á Rede, o que reduciría as súas
necesidades de transferencia para estes mercados (aínda que ofrecendo tamén a
posibilidade de acceder á súa versión completa).
Incluso YouTube estaría a priorizar os vídeos en definición estándar para
países pouco rendibles, de xeito que poderían limitar o que gastan en largo de
banda en cada país, o que faría que o servizo fose lento e afastaría á
audiencia dos clips en alta definición.
Facebook podería optar por reducir a calidade dos vídeos e imaxes que cheguen
dende certas rexións. En definitiva, que todos os grandes servizos que contan
cunha presenza global moi importante están a planificar xeitos de reducir os
seus gastos en transferencia de datos a rexións nas que non cobren custos, o
que afastaría cada vez máis a estes países do primeiro mundo, agrandando a fenda dixital que nos separa.