Os cursos multimedia e audiovisual da Rede CeMIT acolleron máis de mil alumnos
luns, 5 de decembro do 2011
Temos novo reconto das accións desenvolvidas nas
aulas da Rede de Centros para a Modernización e Inclusión Tecnolóxica de
Galicia, as aulas CeMIT. Segundo
informan as secretarías xerais de Medios e Modernización (responsábeis
desta rede), as aulas de máis de trinta localidades galegas deron acubillo
dende o 21 de marzo até o pasado xoves,
1 de decembro, a máis de mil alumnas e alumnos con motivo das actividades incluídas
no seu Programa de Formación Multimedia e Audiovisual. Actividades todas elas
ligadas aos sectores multimedia e audiovisual, combinando as modalidades
presencial co e-learning.
Segundo se engade, os participantes tiveron “a oportunidade de coñecer de
primeira man todos os segredos relacionados co streaming de audio e vídeo, a
desenvolver webs para dispositivos móbiles, ou a crear videoxogos dende as
aulas CeMIT dos distintos concellos galegos”. Isto
polo que respecta ao desenvolvido. Isto polo que respecta ao Programa de
Formación Multimedia e Audiovisual. No que se refire ás iniciativas do Programa
de Formación 2011, dicir que a rede CeMIT está a impartir durante este ano en 89 concellos galegos máis de mil cursos de balde cunha asistencia
estimada de 10.000 alumnos.
Ademais do Plan de Formación, informan as devanditas secretarías, “a Rede CeMIT desenvolve campañas de
sensibilización e divulgación da importancia e beneficios das TIC entre a
cidadanía, empresas e outros colectivos coa organización de charlas e
conferencias”. De xeito paralelo, a maioría dos centros da Rede contarán co
servizo de “aula aberta”, que
posibilitará o acceso libre e de balde dos usuarios á utilización do
equipamento co apoio e asesoramento dun axente especializado.