Os consumidores denuncian dúas webs por publicidade enganosa
martes, 8 de febreiro do 2011
A Asociación
Xeral de Consumidores (ASGECO), vén de anunciar que acolle, segundo afirma,
“con satisfacción”, o inicio de
actuacións de oficio contra as webs Globaliza.com e Idealista.com, por suposta
publicidade enganosa, que poderían dar lugar á apertura de sendos expedientes
sancionadores.
A Confederación asegura que as
devanditas web “poderían estar incurrindo
en prácticas desleais” ao emitir “informacións
falsas aos usuarios”.
Ámbalas dúas webs ofrecen publicar
anuncios inmobiliarios de balde, porén posteriormente, o usuario é informado de
que, para comezar a operación, debe “validar
o seu teléfono”, a través do envío dun SMS
Premiun ou unha chamada a un 902, que teñen un custe adicional.
En concreto, a web Idealista.com
ofrece publicar un anuncio “gratuitamente”
de forma reiterada ata que, inmediatamente antes de comezar o rexistro no
sitio, informa ao usuario de que deberá ter a man o seu teléfono para comezar a
publicar, tamén cun custe de servizo Premium
SMS.
Dende a Asociación de Consumidores
aseguran ter tratado de poñerse en contacto con ambas webs, “sen recibir resposta positiva algunha ás
nosas peticións”, afirman.
É por isto que ASGECO, vén de
esixir a eliminación de “calquera
expresión que poida referirse a unha suposta gratuitidade do servizo” ou
ben “a retirada da esixencia de empregar
os servizos Premium por parte dos usuarios”.
ASGECO CONFEDERACIÓN agarda agora
que, perante a posible apertura de expedientes por parte da Administración
competente, “estes portais rectifiquen na
súa política de engano masivo aos consumidores” ou ben, no caso de
persistir na súa teima por sacar partido da estafa, “a Administración encargada, esté á altura das súas responsabilidades e
inicie os procedementos oportunos para establecer as sancións pertinentes”.