Os campus coruñeses celebrarán a G-Night cun amplo e variado programa de actividades
luns, 25 de setembro do 2023
A Universidade
da Coruña acolleu hoxe a presentación do
extenso programa de actividades da terceira edición da G-Night, a
Noite Galega das Persoas Investigadoras, que se vai desenvolver
os días 29 e 30 de setembro nas sete principais cidades de Galicia,
da que a UDC coordina os actos que se desenvolverán nas cidades da
Coruña e Ferrol.
As encargadas da presentación foron a vicerreitora
de Igualdade, Cultura e Deporte, Cristina López Villar; a
coordinadora da Unidade de Divulgación Científica e Cultural da
UDC, Cristina Naya; e a directora técnica do Centro de Investigación
en Tecnoloxías Navais e Industriais (CITENI), Anne Gosset. O evento
de divulgación celébrase co lema Conciencias Creativas o
último venres de setembro, de xeito simultáneo en case 400 cidades
europeas.
A Universidade da Coruña estará presente xunto
co resto de universidades galegas nun amplo programa de actividades,
as cales terán lugar en diversas localizacións das cidades da
Coruña e Ferrol, coa finalidade de amosar a diversidade da ciencia e
a tecnoloxía, e o seu impacto na vida da cidadanía. A vicerreitora
Cristina López puxo en valor esta iniciativa que “representa unha
oportunidade moi importante para achegar o coñecemento da
Universidade a todas as persoas e tamén para romper estereotipos
sobre quen lidera moitos dos proxectos de investigación máis
importantes da UDC, que son mulleres”.
Cristina Naya debullou a axenda do evento na
cidade da Coruña, cun programa que poderá acoller a máis de mil
persoas. Este ano a UDC conta coa colaboración dos distintos centros
de investigación da UDC, os museos científicos coruñeses, o Museo
Nacional de Ciencia e Tecnoloxía, o persoal de investigación do
Instituto de Investigacións en Ciencias Biomédicas, a Sociedade
Española de Bioquímica e Bioloxía Molecular e o Centro de
Investigación e Tecnoloxía Matemática de Galicia.
Ofreceranse actividades en horario de mañá,
dirixidas principalmente ás entidades educativas, e de tarde para o
público e xeral. Terán lugar no Centro Interdisciplinar de Química
e Bioloxía (CICA), o Centro de Investigación en Tecnoloxías da
Información e as Comunicacións (CITIC), o Centro de Innovación
Tecnolóxica en Edificación e Enxeñaría Civil (CITEEC), a Escola
Técnica Superior de Náutica e Máquinas, o MUNCYT, a praza de María
Pita, La Olímpica bar en Alfredo Vicenti e o estudo teatral Casa
Hamlet, na rúa Alfonso VII.
A encargada de presentar a programación de Ferrol
foi Anne Gosse, cidade na que ten previsto acoller a máis de 600
persoa nas diferentes actividades. Os eventos terán lugar en xornada
de mañá e tarde no propio CITENI, pero tamén no Centro de
Innovación e Servizos da Tecnoloxía e o Deseño da Cabana (CIS).
Todas as actividades da G-Night teñen carácter gratuíto e
a participación é de xeito presencial.