Os alumnos do Máster en Consultoría de Software Libre defenderán os seus proxectos perante inversores privados
xoves, 24 de xuño do 2010
O Máster en Consultoría de
Software Libre da Escola Superior de Enxeñería Informática, o primeiro
máster oficial público en fontes abertas do noso país que en setembro iniciará
a súa terceira edición, vaille dar a oportunidade aos seus alumnos e alumnas de
presentar os seus traballos finais perante posibles inversores que os avaliará
e barallará a posibilidade de poñelos en práctica.
Ao longo dos días 16 e 17 de xullo,
os alumnos e alumnas participantes reuniranse cos inversores para convivir e
intercambiar puntos de vista. Deberán presentarlles as súas ideas ata
convencelos de que invistan diñeiro nelas, tanto durante o acto en sí da
exposición como nunha cea posterior, na que se verán na obriga de expresar e
comunicar axeitadamente a súa idea.
O enxeñeiro Javier Rodeiro, codirector do
Máster, asegura que “as empresas de investimento
privado están sempre á procura de boas ideas nas que involucrarse” e nesta
edición do máster hai un total de 28 alumnos con grandes ideas para
desenvolver.
Estes alumnos, distribuídos en
grupos, desenvolveron 7 ideas empresariais que terán agora que defender, porén
farano dunha maneira moi orixinal e demostrando estar preparados para
desenvolver unha empresa dende que xurde a idea ata o final.
