Os alumnos de Jazz da Coruña coñecerán por videoconferencia aos seus ídolos

A partir das 17:00 horas desta mesma tarde, moitos dos alumnos de jazz da Escola Superior de Música da Coruña poderán ver cumprido un dos seus soños máis cotizados: coñecer de primeira man ás estrelas norteamericanas Steve Brown e Walter White, así como aos galegos Alberto Conde, Roberto Somoza, Kin García e Miguel Cabana, moitos dos ídolos destes alumnos.
A Secretaría Xeral de Medios, a través do Centro Multimedia de Galicia, fará posible este soño dende o telecentro de comunicación da Coruña, permitindo que se comuniquen, a través de videoconferencia, cos devanditos veteranos e afamados músicos de Jazz.
Trátase dunha iniciativa da campaña Comunícate do Centro Multimedia de Galicia coa que se pretende dar a coñecer o proxecto musical destes artistas Atlantic Bridge e o seu primeiro álbum, que será presentado en España o vindeiro mes de xaneiro.
Atlantic Bridge é o nome co que bautizaron a súa unión catro músicos galegos (Alberto Conde, Roberto Somoza, Kin García e Miguel Cabana) e dous norteamericanos (o guitarrista Steve Brown e o trompetista Walter White). A música dos catro artistas galegos, profesores do departamento de Jazz do Conservatorio Superior de Música da Coruña, chegou a oídos do guitarrista Steve Brown, que unido á gran conexión dos últimos anos entre o Jazz con raíces galegas e o americano, fixo que a idea de compartir escenario os seis músicos fose cobrando forma. Así, tras varios concertos por Europa, os músicos galegos viaxan a Estados Unidos e en febreiro deste ano gravan o seu primeiro disco xuntos. Este primeiro álbum será presentado en España no vindeiro mes de xaneiro.
A través de videoconferencia coa universidade de Ittaca, os alumnos do Conservatorio Superior de Música da Coruña, poderán escoitar e falar con estes grandes músicos ao outro lado do atlántico para coñecer máis afondo o proxecto Atlantic Bridge e por que, despois de percorrer toda Europa, Steve Brown e Walter White deciden colaborar cuns dos mellores músicos do Jazz galego. No telecentro de comunicación da Coruña, o alumnado estará acompañado polos catro músicos galegos integrantes do proxecto.