Os Museos Científicos Coruñeses poñen en marcha visitas escolares virtuais
luns, 9 de novembro do 2020
Os
Museos
Científicos Coruñeses, co fin de paliar as limitacións á
presencialidade que poñen en xogo os protocolos COVID, veñen de
lanzar unha oferta de visitas escolares virtuais que, en palabras
da alcaldesa, Inés Rey, permiten ampliar o nivel de actividade
divulgativa dos museos “demostran que están preparados para
incorporar novos formatos máis alá das necesidades derivadas da
actual situación”.
A
Casa das Ciencias, a Domus e o Aquarium Finisterrrae desenvolveron un
conxunto de actividades para os grupos escolares que desexen
visitalos e gozar das súas experiencias sen saír da aula. As
visitas virtuais, que se realizarán a través dunha aplicación de
vídeo-conferencia, permitirán ademais interactuar coa aula a través
do vídeo ou do chat. As actividades están abertas a todos os
centros educativos de España, aínda que se lle dará prioridade os
colexios da cidade.
A
alcaldesa, Inés Rey, explicou que “temos claro que os mc2
funcionan como atractivo para o turismo, pero iso non significa que
perdamos de vista a súa función esencial, que é educativa e de
moita relevancia nestes tempos nos que se está demostrando que a
aposta pola ciencia supón un eixe vital como sociedade”.
A
Domus ofrece un completo programa de obradoiros que inclúen
diseccións en directo de corazón, de ollo e de flores, así como
visitas virtuais á exposición sobre nutrición, acompañadas de
xogos interactivos e experimentos.
No
Aquarium Finisterrae haberá visitas guiadas á sala Maremagnum,
deténdose nos ecosistemas mariños dos grandes acuarios, e na vida
intermareal da Charca das Caricias. Tamén haberá unha visita á
sala Nautilus, onde se poderá coñecer aos peixes de maior tamaño
que nadan alí, como as quenllas, corvinas, douradas, robalizas e
meros, así como os bancos de cabalas e xurelos.
Doutra
banda, os grupos que elixan a Casa das Ciencias poderán descubrir,
realizando unha conexión en liña desde a exposición Puro Swing,
os experimentos con péndulos de Galileo e Foucault que cambiaron a
historia da ciencia.
Estas
visitas virtuais serán de balde para todos os grupos escolares que
as soliciten, e estarán dispoñíbeis para todos os niveis
educativos. Toda a información e os formularios de solicitude de
visita están xa accesíbeis na
web do Concello da Coruña.