Os Amigos da Dorna Meca estrean web
martes, 14 de abril do 2015
A asociación Amigos da
Dorna Meca, centrada na recuperación da tradición mariñeira do
Grove e de Arousa (e sobre todo da parte desa tradición máis
relacionada coas embarcacións, sendo a dorna o símbolo con toda
probabilidade máis representativo) vén de informar da posta en
marcha da súa nova web. Os
obxectivos desta páxina acabada de estrear, comentan, son os de
manter á comunidade asociativa (e demais persoas interesadas)
informada das accións do colectivo e, tamén, crear un punto de
referencia da historia da asociación e, por extensión, da tradición
mariñeira do Grove.
A web abrangue
coñecemento completo e detallado sobre as diferentes embarcacións e
actividades (presentes e históricas) realizadas, “que será
ampliado frecuentemente mediante un traballo de documentación”,
explican dende a asociación arousá, que tamén fai saber que o
sitio en liña será un sitio en liña en permanente construción,
acollendo contidos de continuo e incluíndo datos dos integrantes do
colectivo (formado por máis de 100 persoas), os colaboradores e as
persoas interesadas en xeral na preservación da tradición mariñeira
galega. A web, dende a que se convida a asociarse
á comunidade en liña (e máis a navegar
nos barcos cos que conta o colectivo), incorpora a maiores os
seguintes apartados: Inicio, Historia, Barcos, Actividades,
Tradición e Contacto.