Orama: tecnoloxía galega para converter o móbil nunha xanela á información da nosa cidade
luns, 12 de setembro do 2011
Agora que en boa medida temos a tecnoloxía, só falta
incidir nas súas múltiples aplicacións. Un ámbito de traballo especialmente
interesante é, sen dúbida, todo o que teña que ver coa transformación das cidades
nas que vivimos en algo como accesos múltiples e universais á información que
precisamos. Nesta liña de incluír no tecnolóxico-dixital o que decote se viña
facendo de xeito presencial e empregando esforzos, papel e tempo, é onde se
move a empresa galega Contact
Comunicación, con sede na Tecnópole de San Cibrao das Viñas, en Ourense. A
súa arela é crear un contorno urbano onde o coñecemento estea na pantalla do
noso móbil, tan preto como nos poidamos imaxinar. Niso consiste o seu servizo
Orama.
Máis polo miúdo e segundo informa a propia empresa, trátase
dunha canle de comunicación móbil que xorde para substituír á publicidade que
se nos achega polo vieiro tradicional, a través de impresos en papel “que a maior parte das veces tiramos ao chan
ou a unha papeleira e sen que ninguén lles preste moita atención”, por información
na pantalla do noso dispositivo, dispoñíbel os 365 días do ano, as 25 horas do
día e sempre actualidade. Asemade, engádese, ao eliminar o tradicional sistema
de impresión, diminúese de xeito drástico o custe económico e máis o medio
ambiental.
A canle foi desenvolvida, como dixemos antes, por Contact
Comunicación, unha empresa galega especializada na procura de novas ferramentas
de información para os diferentes tecidos produtivos, ferramentas máis eficaces
para os anunciantes, menos invasivas
para os usuarios e máis respectuosas co medio.
Segundo se fai saber na tenda de Apple (así como no Android Market),
na que está dispoñíbel Orama, estamos ante unha aplicación encamiñada á promoción
de todo tipo de actividades e a localización de puntos salientábeis dentro
dunha cidade. “Por exemplo”, explícase,
“estando situados no centro de Madrid, poderemos
ver os eventos que se están a levar a cabo nunha contorna de 20 kms á redonda,
así como lugares senlleiros da cidade que pague a pena visitar”.
Vídeo de prensetación de Orama
- Imaxes da aplicación móbil baixo Android e iOS