Oracle quere combater o desemprego cunha escola de novos empresarios

Oracle España quere apoiar aos recentemente titulados e desempregados cunha Escola de Emprendedores. O obxectivo da mesma: axudarlles a desenvolver os seus proxectos empresariais. Para achegarlle ao proxecto o máximo alcance, empregados voluntarios de Oracle impartirán a formación tecnolóxica e de negocio para inspirar novas oportunidades de mercado. A iniciativa, informa a multinacional, está deseñada para axudar a facer fronte ao problema máis perentorio da economía española, o desemprego, que afecta xa a un 27 % da poboación activa. A escola, informa Oracle, facilitará aos seus alumnos unha serie de sesións formativas presenciais ao longo de tres meses.
Estas sesións virán da man de profesionais da firma e cubrirán diversos aspectos como organización empresarial, mercadotecnia e comunicación, obtención de financiamento, xestión, aspectos lexislativos e normativos, creación dun plan de negocio e uso da tecnoloxía na empresa. Ao remataren o período de formación presencial, voluntarios da compañía exercerán de mentores dos alumnos, asesorándolles durante un período de 9 meses e axudándolles a pór en marcha os seus proxectos. A primeira do tres edicións do curso para emprendedores previstas para 2013 comezou o 8 de maio, dirixida a 8 mozos titulados en formación profesional. O obxectivo da Escola de Emprendedores Oracle é realizar tres ciclos de formación por ano. As dúas seguintes edicións estarán dirixidas a mulleres e a desempregados de máis de 45 anos. Para esta primeira andaina do programa, Oracle contou coa colaboración do centro de formación profesional IES La Paloma, que, segundo explica a compañía, contribuíu no proceso de promoción e escolma de alumnos, contándose entre os obxectivos do centro educativo a creación dun viveiro de empresas e a promoción de actividades relacionadas co emprendemento.