Oracle doa o OpenOffice.org á Fundación Apache
venres, 3 de xuño do 2011
Finalmente semella que unha parte das dúbidas
sobre o futuro de OpenOffice.org, o
paquete ofimático libre en mans da empresa Oracle (segundo puidemos comprobar
nos últimos tempos, pouco dada a dar continuidade ao proxecto de software
aberto), fóronse despexando. Segundo se
conta na Rede, logo de meses sen saber moi ben que facer con OpenOffice,
Oracle decidiu agasallarlle o paquete ofimático á Fundación Apache, que recibirá
o código base do programa para seguir adiante co desenvolvemento do proxecto,
nos últimos tempos un pouco parado aínda que con continuidade (iso si) en
iniciativas paralelas que recolleron a súa testemuña, como LibreOffice.
Con esta decisión de Oracle, unha parte do
problema semella amañado, e o OpenOffice xa pode saír –teoricamente- do dique
seco. Polo menos así o entende a propia empresa doante, que sinala con esta
nova andaina ao abeiro de Apache, dáselle á popular ferramenta de procesamento
de textos (e outras moitas funcións) “un
claro pulo de madurez, apertura e unha infraestrutura ben establecida para
continuar no futuro”. Pola súa parte, a Fundación Apache recibiu o paquete
informático do mellor xeito posible, prometendo un compromiso a prol do seu
desenvolvemento, sendo Jim Jagielski, presidente da entidade, a persoa designada
para dirixir a comunidade OpenOffice.org durante o proceso de integración.
Segundo
se nos informa dende a web de Genbeta, con esta operación confírmase algo
que xa se supuña: que OpenOffice.org era unha pedra no zapato para Oracle e non
sabían moi ben como quitala. A decisión de doala a Apache está a ser
cualificada como decisión do máis razoable, e máis tendo en conta que a
destinataria é unha fundación estable que de seguro que dará continuidade ao
proxecto. A dúbida está en saber se LibreOffice e OpenOffice.org volverán ser
unha única iniciativa.