Oppo presenta unha tecnoloxía que permitirá cargar completamente a batería dalgúns smartphones en 15 minutos

Un dos fabricantes chineses de smartphones que máis coida os seus produtos é, sen dúbida, Oppo, que é tamén dos poucos que atrévese a vender directamente os seus produtos en Europa, ofrecendo terminais con excelentes acabados e potente hardware, que levan tempo integrando sistemas de carga rápida cos que pretenden paliar un dos problemas da autonomía dos terminais (xa que ao incrementar a capacidade das baterías o tempo de carga dispárase) e no marco do Mobile World Congress de Barcelona sorprenderon anunciando unha nova versión desta tecnoloxía, chamada SuperVOOC, e que presume de ser capaz de cargar a batería dalgúns dos seus smartphones en só 15 minutos.
Concretamente dende Oppo aseguran que son capaces de levar ao 100% de carga unha batería de 2.500 mAh en 15 minutos a través de cables micro-USB e USB tipo C, superando incluso a tecnoloxía Quick Charge 3.0 de Qualcomm, e sorprendendo por ser unha tecnoloxía que vai chegar ao mercado, xa que non falamos dunha proba de concepto ou do anuncio dunha tecnoloxía experimental.
Para deixar claro que esta tecnoloxía é real, probouse en directo na presentación en Barcelona, e aínda que posiblemente os tempos de carga anunciados só serían posibles en condicións ideais, o que parece seguro é que Oppo conseguiu avanzar nunha área moi importante, deixando claro que non hai que ser Apple ou Samsung para poder innovar.