OpenSpain LAB e Telefónica lanzan unha web para axudar na integración dos refuxiados
martes, 31 de maio do 2016
A
operadora Telefónica presentou esta semana unha páxina destinada a
ceibar de atrancos o vieiro da inserción dos refuxiados en España.
A web foi posta en marcha por un equipo de mozos de varios países
(un total de nove, integrantes dun laboratorio impulsado por
Telefónica), e complementará a súa actividade cunha ferramenta
móbil específica. Para o seu desenvolvemento, contouse coa
colaboración de Red.es, o Ministerio de Emprego e Seguridade Social,
ACCEM e Madrid International LAB. O proxecto, denominado OpenSpain,
estará dispoñíbel en árabe, inglés e español. Abranguerá
información sobre o acceso e aloxamentos de balde e en aluguer,
datos sobre como regularizaren os refuxiados a súa situación ou
sobre como acadar o cartón sanitario.
OpenSpain LAB é un
proxecto de integración desde a integración, desenvolvido por mozos
profesionais e estudantes de países como Siria, Iraq, Irán, o
Sáhara, Venezuela e España. A iniciativa pretende “facilitar a
integración de persoas que cheguen a España en situacións
desfavorecidas, e está enmarcado dentro da iniciativa Join de
Telefónica, desde a que os mozos con talento apoian a transformación
dixital”.
O equipo, formado por
oito mozos e unha moza de entre 23 e 29 anos, compleméntase como
dixemos cunha aplicación para trebellos móbiles. Segundo fai saber
Telefónica, trátase “da primeira ferramenta destas
características dirixida tanto aos refuxiados como ás ONG que lles
prestan servizos nunha primeira etapa de establecemento”. A app,
que estará plenamente desenvolvida en agosto, ofrece acceso a
información que guíe a estas persoas no seu proceso de chegada.
OpenSpain LAB forma parte
da iniciativa Join de Telefónica, desde a que os mozos con talento
apoian a transformación dixital, impulsando as novas capacidades
dixitais, a través de proxectos comprometidos coa sociedade e coa
economía dixital. Neste laboratorio os mozos integrantes están a
desenvolver unha solución tecnolóxica que será unha axuda real
para os estranxeiros que chegan a España na procura de amparo e
acubillo.
Os participantes de
OpenSpain LAB, estudantes e mozos profesionais de diversas áreas
como informática, comunicación ou deseño, incorporábanse a este
proxecto de seis meses de duración o pasado 1 de febreiro nas
instalacións situadas no Madrid International LAB.