OneDrive integrará Copilot en abril

Microsoft anunciou hoxe que o servizo de almacenamento na nube OneDrive vai integrar finalmente a finais do mes de abril o asistente de intelixencia artificial Copilot, o que transformará o xeito de interactuar cos ficheiros.
Este asistente permitirá extraer respostas de documentos, presentacións, follas de cálculo e outros ficheiros, cunha sinxela orde de texto, que localizará os resultados nos nosos ficheiros para darnos acceso instantáneo á información dos documentos que almacenamos na nube.
O asistente pode responder a preguntas sobre os contidos dos nosos ficheiros, é capaz de comparar distintos arquivos, entende a linguaxe natural á hora de darlle ordes e pode xerar documentos con resumos, táboas ou relacións de preguntas frecuentes con información extraída dos documentos que indiquemos.
Resulta especialmente práctica a funcionalidade de xeración de resumos, o que pode aforrar moito tempo cando queiramos identificar documentos, xa que o sistema pode indicar o máis destacado de longos documentos (incluíndo os que estean en formato PDF).
Copilot funciona cos formatos de documentos ofimáticos máis habituais e inicialmente pode entender numerosos idiomas entre os que están o inglés, o portugués e o español, ampliándose a máis linguas paulatinamente (non habendo polo momento unha previsión do soporte do galego).